Умгьанат Сулейманова
Украинайиъ гъябгъюрайи хусуси метлеб айи операцияйиъ иштирак шулайи, Табасаран ва Хив районариан вуйи жигьиларин игитваларикан кми-кмиди хабрар гъюра, дурари женгнан гъуллугънаъ ватандиз вафалувал улупбаз лигну, абйир-бабариз ва райондин администрацйириз чухсагъул мялум апIру кагъзар хътаура. Улихьнаси Табасаран райондин глава Мягьямед Къурбановдин адресназ Хючна гъулан агьали Аьгьяд Абаевди гъуллугъ апIурайи частнан командованиейихьан чухсагъулин кагъаз гъафну.
«Гьюрматлу Мягьямед Сиражутдинович! Ичв дагълу жигьил женгчи Аьгьяд Абаев ич полкнан дахилнаъди хусуси метлеб айи дявдин операцияйиъ думу ккебгъу садпи йигъланмина иштирак шула. Чан гъуллугънан буржйир намуслувалиинди тамам апIбаъ дугъу юлдшариз нумуна улупура, частнан командованиейин ва юлдшарин арайиъ аьхю гьюрмат гъазанмиш дапIна. Украинайиъ кIули гъябгъюрайи хусуси метлеб айи дявдин операцияйиъ Аьгьядди саб-швнуб ражари кьягьялвал, игитвал ва кIубанвал улупну. Жвуван халкь, Ватан бадали намуслувалиинди эскервалин буржи лайикьлуди тамам апIурайивализ лигну, думу хайлин медалариинди лишанлу дапIна», – дибикIнайи дидиъ.
Гьелбетда, гьамцдар тярифнан ва гьюрматлу гафари, эскрин абйир-бабаринси багахьлуйиринси, дугъан ватанагьлийиринра юкIв шад апIуру.
Аьгьяд Абаев ва 1993-пи йисан Табасаран райондин Хючна гъулаъ бабкан гъахьну. Гьамцир бай тербияламиш апIбаз гъи ухьу дугъан адаш Артикдиз ва дада Тамилайиз чухсагъул дупну ккунду. Артик Абаев хайлин йисари налогар уч апIру гъуллугънаъ гъилиху кас ву, хъа Тамила Абаева Хючнаъ ерлемиш дубхьнайи 1-пи нумрайин мектебдиъ мялимди лихура. Дурариз 2 велед а – риш ва бай. Дупну ккундуки, чан уьмрин хайлин йисар мялимвализ бахш гъапIу Тамилайи, гьелбетда, чан бицIидаризра ужуб тербия тувну.
Аьгьяд, 2010-пи йисан мектеб ккудубкIну, Мягьячгъалайиъ ДГУ-йин юридический факультетдик урхуз кучIвну. Вуздиъ урхувал ккудубкIну, 2016-пи йисан чан эскервалин буржи тамам апIуз армияйиз гъушну. Армияйин вахт ккудубкIбан кьяляхъ жигьили контрактдиинди яракьлу кьувватариъ гъуллугъ давам апIуз йикьрар гъийитIну.
Украинайиъ хусуси метлеб айи дявдин операция ккебгъу йигъланмина Аьгьяд Абаев душваъ иштирак шула.
Узу телефондиан Аьгьяддихьна илтIикIу вахтна, йиз суалари дугъан кIваз ужуб дару тясир апIурайиб аьгъю гъабхьунзуз. «Вари суалариз жавабар, учу гъалиб духьну гъафиган, тувдихьа», – гъапну Аьгьядди.
