Зубайдат Шябанова
26-пи июли Табасаран райондин Хючна гъулаъ Кьалухъ Мирзайин ччвурнахъ хъайи спортдин дараматдиъ Урусатдин Игит, гвардияйин майор Руслан Къурбановдин гьюрматназ ва Дагъустан Республикайин Конституцияйин йигъаз бахш вуди, юкьяр дисбаан бицIидарин ва живанарин арайиъ республикайин турнир кIули гъубшну.
КIваин апIурхьа: Руслан Къурбанов Табасаран райондин ТIаттил гъул’ан ву. Думу гьюлин пияда кьушмарин кIул’инди вуйи 40-пи гвардейский бригадайин танкарин батальондин командир ву. Хусуси метлеб айи дявдин операцияйин женгариъ улупу дирбаш’вализ ва кьягьялвализ лигну, дугъаз «Урусатдин Игит» ва «Донецк Халкьдин Республикайин Игит» ччвур тувна.
Спортдин талитар меценат Парди Аьбдуллаевдин спонсорвалин кюмекниинди Табасаран райондин администрацияйи тешкил гъапIнийи.
Му йигъан Хючна гъулаз, табасаран халкьдин кьягьялиз гьюрмат улупури, талитариз лигуз хайлин хяларра дуфнайи: Дагъустандин Главайин Халкьдин Собраниейиъ айи вакил Нюсрет Уьмаров, РД-йин бицIидарин месэлйир гьял апIбаан гьуркIу ихтиярар тувнайи вакил Марина Ежова, РД-йин милли политикайиз ва диндин ляхнариз лигру министр Энрик Муслимов, РД-йин жигьиларин ляхнариз лигру министр Камил Саидов, Халкьдин Собраниейин депутатар Алавудин Мирзабалаев ва Сефер Аьлиев, Хив райондин глава Ярмет Ярметов, Дагъустандин Огни шагьрин мэр Замир Гьяжимурадов ва гь. ж..
Турнириъ яшарин ва гъагънан 18 категорияйиъ Табасаран, Хив, Гъяйтагъ, Дербент районарин, Дербент ва Дагъустандин Огни шагьрарин командйирин 2010-2019-пи йисариъ бабкан гъахьи 200-тIан артухъ спортсменар иштирак гъахьну.
Талитар ачмиш апIру шадлугънан серенжемдиъ Дагъустандин Глава Сергей Меликовдин ччвурнахъан уч духьнайидар Нюсрет Уьмаровди къаршуламиш гъапIну. Дугъу спортсменариз маракьлу ва варидарин гьевес за апIру кчIихбар ва лайикьлу натижйир ккун гъапIну ва жигьиларин тербияйиз гьаму жюрейин серенжемари важиблу роль гъабхурайиваликан гъапну.
Мягьямед Къурбановди тамашачйирихьна ва хяларихьна илтIикIури, табасаран халкьдин игит Руслан Къурбановдин гьюрматназ вуйи му талитар аьдатнаъ ахьрувалик, дурари республикайин йисандин спортдин серенжемарин календариъ лайикьлу йишв бисрувалик ва йислан-йисаз дидин иштиракчйирин кьадар артухъ шлувалик умуд кивну.
Талитар ккергъайиз Руслан Къурбановра сягьнайиина удучIвну гъулхнийи. Дугъу му талитар тешкил гъапIдариз кIваантIан чухсагъул мялум гъапIнийи ва спортди, физический культурайи инсандин хасиятназ тувру хайирнакан ктибтнийи.
«Узуз гьаму турнир республикайин спортдин талитарин хьадан графикдик кипну ккундийзуз. Спортдиин машгъул вуйидариз аьгъя, хьадан вазар «ичIидар» шулу, варидари рягьятвал гъадабгъуру ва, саб жюрейинра талитар адруган, спортсменар буш шулу. Хьадну му турнир кIули гъабхури гъабхьиш, спортсменариз буш хьуз вахт гъубзидар.
Сабсан пуз ккундузуз: юкьуб ваз улихьна узуз ЦСКА клубдин кIули гъахру саб турнириъ юкьяр дисбаан спортдин устаддин норматив тамам гъапIунза. Ва узуз Урусатдин спортдин устаддин ччвур тувбан кьяляхъ му турнир неинки Урусатдин Игитрин ччвурнахъ вуйи, хъа Вариурусатдин «устадвалин» турнир дубхьну ккундузуз. Метлеб фу ву гъапиш, думуган ихь жигьилари вариурусатдин дережайин талитариъ иштирак хьуз ва «спортдин устад» ччвур гъазанмиш апIуз мумкинвал хьибди.
РД-йин спортдин министерствойи му месэла гьял апIур кIури, аьхю умуд кайиз», – гъапнийи Руслан Къурбановди.
Талитар гизаф маракьлуди кIули гъушнийи. Жигьил спортсменари гъалибвалихьна айи чпин дурумлу гьевес, кьастнан ижмивал, ужуб гьязурлугвал улупнийи.
Залиъ айи тамашачйирира, хяларира гьарсаб талитназ гьевеслуди лигури, спортсменарик гарччлариинди гьевес капIрайи.
Тамашачйир му йигъан хайлин кчIихбарин шагьидар гъахьну. Гьарсаб гъагънан категорияйиъ призерариз кубокар, медалар, дипломар ва пешкешар тувну. Хъа гъалибчйир, му пешкешарилан гъайри, чемпионвалин чIуларинра сагьибар гъахьну.
Уьмуми натижайиъ сабпи йишв Табасаран райондин командайи, кьюбпи йишв Дагъустандин Огни шагьрин спортсменари, шубубпи йишв – Дербент шагьрин командайи гъадабгъну.
