Зубайдат Шябанова
Гьаму йигъари Табасаран райондин глава Мягьямед Къурбановдин ччвурнахъ хусуси метлеб айи дявдин операцияйин гьюжум гъабхру дестейин командир, капитан, ТIивак гъул’ан вуйи Абакар Исмяиловди гъуллугъ гъабхурайи военный частнан командованиейихьан Чухсагъулин кагъаз гъафну.
Абакар Исмяилов 2023-пи йисан Новосибирскдиъ высший военный командный училище ккудубкIбан кьяляхъ, чан хушниинди хусуси метлеб айи дявдин операцияйиз гъушну.
Думу Купянск, Волчанск нацистарихьан азад апIбаъ ва Курскдин аьтрафариин гъягъюрайи, женгариъ иштирак гъахьну. 2024-пи йисан майдин вазли «Россия 1» телеканалиан, Абакар Исмяиловди Урусатдин пайдагъ Волчанскдин саб кючейиъ гъабхури ва думу пайдагъ багарихьди шагьрин кьялаъ кебхрувалин гаф туври, репортаж улупнийи. Женгариъ улупу дирбаш’вализ лигну, Абакар Исмяилов Кьягьялвалин ва Игитвал улупбаз лигну орденариинди лишанлу дапIна.
«272-пи мотострелковый полкнан командованиейи учвуз заан дережайин офицер, гьюжум гъабхру дестейин командир, капитан А.М.Исмяиловдиз ужуб тербия ва гьязурвал тувбаз баркаллагь мялум апIура. А.М.Исмяиловди учв ужудар аьгъювалар айи ва вахтниинди кьатI’и уьлчмйир кьабул апIуз шлу жюрэтлу командирси улупура. Гьюжмин операцйириъ дугъан бажаругъ гьяракатариинди, дявдин гъагъи аьгьвалатнаъ вахтниинди кьатI’и уьлчмйир кьабул апIбиинди улихь дивнайи метлебар вари кIулиз адагъуз гъабхьну.
Учвуз ичв жавабдар гъуллугънаъ заан хъуркьувалар, хушбахтлувал ва мюгькам сагъвал ибшри!» – дибикIна Чухсагъулин кагъзиъ.
Мягьямед Къурбановди хусуси метлеб айи дявдин операцияйиъ айи ихь ватандашариинди дамагъ апIурайиваликан гъапну. Дугъан гафариинди, райондин агьалйир чпин дирбаш’валиинди ва кьягьялвалиинди гьаммишан тафавутлу шула. Ихь тарихдин кагъзариъ ва китабариъ мидкан кьатI’иди дибикIна. Главайи гьацира ихь эскрарин ватанпервервал ва дирбаш’вал хизандиъ абйир-бабари дагълу аьдатариинди туву тербияйин натижа вуйивал субут гъапIну.
