Наргиз Гюлечова

Мягьячгъалайиъ яшамиш шулайидаризси, жара йишвариан гъюрайи хяларизра халачачивалиан мастер -классар улупурайи ихь ватанагьли Зарият Гьяжиибрагьимова «Дада-дилаварчи» кIуру грантдин конкурсдиъ гъалиб гъахьну. Зарият Гьяжиибрагимова дилаварчйириз кюмек туврайи «Йиз Бизнес» Ценри тешкил дапIнайи образованиейин цирклиан вуйи конкурсдиъ иштирак гъахьну. Думу конкурс асас вуди жюрбежюр цирклариан дилаварчивал апIбан бадали, янаки му ляхнихьна баяр-шубар жалб апIуз кIури, тешкил дапIнайиб вуйи.

 

Региондин дережайиъди му конкурс тешкил дапIнайиваликан устадар айи дестейиан хабар гъабхьунзуз ва иштирак хьуз кьаст гъапIнийза. Иштирак хьбан бадали 4-пи августдиз, анжагъ яшар бегьем дархьи бицIидар айи ва гьацира декретдин отпускнаъ айи дадйиризтIан ихтияр адайи. Улупнайи категорияйик узура кахърайивализ лигну, дишлади аьрза тувунза. Фицики цIийи аьгъювалар гъадагъузси, халкьдин сяняаьткарвалиан узуз айи тажрубара жарадариз улупузра ккундийзуз.
Гьяфтайин арайиъ учуз, иштиракчйириз, бизнес фици гъабхуруш, пулин дакьатарин анализ фици апIуруш, дюзди жвуван проектар фици презентовать апIуруш улупнийи. Гьаму йигъарин арайиъ улупу агъювалар ишлетмиш дапIну учу гьязур гъапIу проектар хъасин дюрхнура ккундийи», – ктибтура халачачийи.
Ич сюгьбатнаъ Зариятди къайд гъапIганси, проектдин конкурсдиъ иштирак шулайи йигъарин арайиъ гъадагъу аьгъювалариинди дугъу, «Дадайин ирс» ччвур тувну проект гьязур гъапIну. Проекдин асас метлеб, бицIидаризси, ляхин дубгъуз ккунидариз варидиз халачачивалин сяняаьт улупуб ву.

Зарият Гьяжиибрагьимовайи му проект юрутмиш апIурира а. Дугъу Мягьячгъала шагьриъ «Чегери» кIуру мастерская ачмиш дапIну, душваъ халачачивалихъди таниш хьуз ккунидариз му сяняаьтдиан агъювалар улупура. Гъийин йигъаз 200-тIан артухъ мастер-классар духна.
Ихь ванатагьлийи конкурдиз гьязур гъапIу проект варидариз кьабул гъабхьнийи ва дугъаз конкурсдиъ гъалиб хьубаз лигну, 150 агъзур манатдин грантра тувну.