Зубайдат Шябанова
Аьхиримжи вахтари ихь республикайин, гьадму гьисабнаан табасаран миллетдин жигьил баяр Урусатдин жюрбежюр шагьрариъ читин ва хатIалу дюшюшариъ ахьу инсанариз кюмекназ гъафивалин видеороликар хайлин тарагъна. Му жюрейин мялуматар ерхьруган, багъри ватандиан язийиъ айи жигьилариинди дамагъ дарапIди гъузуз шулдар. Узуз ихь дагълу баяр вари игитарси гьиргъурзуз. Хъа, гьяйиф, чпин игит гьунарар ва кIван кьастар бязидари дюз дарди ишлетмиш апIуру.
Гьаму дюшюш улихьна йигъари Москва шагьриъ гъабхьиб ву. Дидин игит табасаран бай Мягьямад ву. Дугъан район ва гъул ашкар апIурадарча, ччвурра гьюдюхюнча. Гьамусяаьт жигьилар урхуз ва лихуз шагьрариз кюч шулайивализ лигну, дурариз гьаму мялуматнакан асар шул кIури, фикир дапIну, чап апIуз йикьрар гъапIунча.
Августдин 10-пи йигъан хябяхъган Москва шагьрин Новослободский кючейиъ айи «Заварка» кIуру клуб жигьилари абцIнайи. Мукьмарин ва жигьиларин аьлхъбарин сесерихьан мушваъ, шли фу кIураш, ебхьурадайи. Жигьилар му клубдиз, ляхнин гьяфта алдабхъган, рягьятвал гъадабгъуз кми-кмиди уч шула. Хайлиндар мушваъ чиб-чпиз танишдира вуйи.
Думу йигъан клубдиъ чан бабкан гъахьи йигъ къайд апIуз Подмосковьейиан вуйи офис-менеджер Каринара чан дуст-шубарихъди дуфнайи. Аку палтар али, машнак шаду инчI кайи успагьи риш хайлиндариз кьабул шулайи. Дугъу дуст шубарихъди ялхъвнин мяракайиз удучIвури, шадди вахт гьапIрайи. Шубарин кьялаъ айи Каринайилан Дагъустандин дагълу райондиан Москва шагьриз тикилишчивалин ляхнариина лихуз дуфнайи 27 йисаъ айи Мягьямадди ул алдабгъурадайи. Клубдиз думура ляхнин кьяляхъ дустарихъди рягьятвал гъадабгъуз дуфнайир вуйи. Саб вахтналан думу Каринайихьна гъюру, ва дурар таниш шулу. Карина саб чIуру фикирра адарди, дугъахъди сюгьбатнаъ учIвру. Сюгьбат рягьятди гъябгъюрайи. Мягьямадди зарафатар апIури, чан ляхникан ктибтури гъахьну, хъа Каринайи чан уьмрин шаду дюшюшар кIаин апIури гъахьнийи. Йишвну шубар клубдиан хулариз гъягъюз удучIвуру. Мягьямадра дурарин кьяляхъди гъягъюру.
Хабарсуз хаб
Клубдиан гьяятдиз удучIвубси Мягьямаддин гаф-чIал жара саягънануб хъюгъру. Дугъан ширин инчI ва гъюдли мани хасият наанди вуш сабдупну гъудубгну. Мягьямадди, Каринайиз даккунди, думу хабаъ тIауз хъюгъру. Хилхъан зигури, дугъу риш чан машиндихьинди хъчIюрхюру. Я шуран, я дугъан дуст-шубарин гьарйир Мягьямаддиз ерхьуз ккунди адайи. Мягьямадди шураз думу кьабул гъахьиваликан ва гъи думу дееетруваликан кIурайи. Аьгьвалат гъагъи шулайиб дябкъну, Мягьямаддин дустар Асланди ва Рустамди бай яваш апIуз ва риш дугъан хилариан учIюгъюз чарйир апIуру. Амма бай чан гафниин дийигънайи. ХъючIюхюрайи риш асфальтдиинди ккадакнушра, дугъу думу хиларихъан зигури гъахурайи. Дуст шубари полицияйиз зенг апIуру. Шуран палтарра кацIну, ликариз асфальтдилан хъчIюхбаан швнуб-саб йишвхьан зийнар гъахьнийи.
«Мага, яваш йихь, уву фйир апIурава?», – кIури, Аслан балин улихь гьучIву. Хъа Рустамди дугъан хилариан Карина азад апIуз хъюгъю. Мягьямадди Каринайиз аьхю сесниинди: «Уву наанкIа гъягъюдарва, уву узухъди гъюрва», — кIурайи.
Кючейиан гъягъюрайидар яваш шули, му аьгьвататназ лигурайи, шли-вуш телефонарин видеойиз адабгъурайи. Аьхирки, Асланди ва Рустамди Мягьямаддин хилариан Карина азад гъапIу. Дуст шубари гучIбаан гукIни духьнайи Каринайиз жилилан гъудужвуз кюмек апIуру. Карина чан кацIнайи лизи палтар ва ифди дарснайи ликар марцц апIури ишурайи. Мягьямад, дустарин хилариан утIурччвну, хъана Каринайиин алархьу. Дустарин ва шубарин гуж аьхюб дубхьну, Мягьямаддихьан Карина чан машиндиъ итуз гъабхьундар. Мягьямад баяри дидисну имиди, шубар таксийихьинди гъягъюрайи вахтна, полицияйин вакилар хъуркьру.
Каринайи дурариз вари фтилан ккебгъуб вуш ва, чав рази даршра, Мягьямадди гужназ дидисну машиндиз гъахури гъахьиваликан ктибтнийи. Полицияйин вакилар «Заварка» клубдин цаларик кайи ва айитI айи видео камерйириз гъилигну.
Мягьямад гьадму йигъан полицияйин вакилари отделиз гъахуру. Силисариъ дугъу чаз риш кьабул гъахьиваликан ва дугъаз чан кIваъ айи гьиссар улупуз ккун гъабхьиваликан гъапнийи. Дугъаз чан гьяракатариъ саб жюрейинра чIуруб рябкъюрадайи ва шураз чIуруб апIуз ният адруваликан кIурайи. Амма силис гъабхурайидари дугъан гьяракатар шуллугъчивалиндар гьисаб гъапIну. Медицинайин кюмек тувру вакилари Каринайин ликарин кьамкьариз ва хилариз зийнар духьнайиваликан ва иццру дапIнайиваликан шагьидвал апIурайи справка тувру.
Гьамусяаьт Морсква шагьрин прокуратурайи, Мягьямеддин гьяракатариъ силисчйири улупнайибтIан артухъ мажбур апIувалин тахсиркарвал аш, ашкар апIури гюзчивалинна ахтармишарин ляхнар ккергъна.
Кьабул гъахьи шуран кIвахьна рякъ му саягъниинди абгруб дар. Мицисдар фикирсуз гьяракатари гьевеслу жигьиларин гележег пуч апIуз мумкин ву. Гьаддиз саб гаф вая ляхин апIайиз, фикир дапIну ккунду.
