Наргиз Гюлечова

Цци 1-пи сентябрихъанмина башламиш дапIну, эйси хъадру жилар гьадагъуз хъюгъра. Мидин гьякьнаан вуйи постановлениейихъ Урусатдин Правительствойи къул гъизигну.

 

Жил хиликк ккади, амма 5 йисандин арайиъ душв’ин фицибкIа дарамат яратмиш дапIну, дидин регистрация адарш, гьацдар эйсйирихьан жилар гьадагъбанди ву. Хъа яшамиш шлу хусуси хулар дивуз жара дапIнайи жилариин 7 йисандин арайиъ фукIа дапIнадарш, дицдар жиларра эйсйирихьан тадагъиди.

Мидланра гъайри, постановлениейиъ улупнайиганси, жилин участокдин аьхюнубсиб пай йисандин арайиъ хъархъвсарихъди вая зир-зибилихъди ккапIну аш ва жилиин тикмиш дапIнайи цалар унчIвар ясана ранккнар гъядарди дирчнаш, дицдар участкйирра эйсйирихьан тадагъуру.

Мидин гьякьнаан республикайин Росреестрин Управлениейи мялум гъапIганси, жилар сарун жара чара адриган гьадагъурайидар ву. Жилин эйсийиз арайиз дуфнайи читин месэла гьял апIуз вахт тувра. Хъа улупнайи вахтнан арайиъ гьял апIуз хъуркьрадарш, суддиинди хъанара вахт артухъ апIуз шулу. Гьадмуганра арайиз дуфнайи месэлайин гьял дигиш апIуз эйси чаламиш дархьиш, андагъ гьадмугантIан дугъхьан жил гьадабгъурдар.