Мейлан Нежефов

Хив райондин глава Ярмет Ярметовдин регьберваликкди райондин администрацияйиъ гъуларин главйирихъди вуйи нубатнан совещание кIули гъубшнийи. Асас суал улихь хьайи сечкйирикан вуйи. Ихь республикайиъ сечкйир шубуд йигъан давам хьиди – 12-пи, 13-пи ва 14-пи сентябри. Райондин агьалйириз сес тувуз 27 участкйирин сечкйирин комиссйир (УИК) тяйин дапIна: 22 мектебарин ва спортзаларин, 2 администрацйирин ва 3 культурайин хуларин дарматариъ.

«Ихь уьлкейиъ 20 региондин губернаторар, 11 региондин районарин, гъуларин ва 25 меркездин депутатар ктагъбан сечкйир кIули гъягъиди. Ухьуз мялум вуйиганси, ихь региондиъ сечкйириз шубуд йигъ улупна. КIулди ихь райондин натижйириз гъилигиш, сечкйир гьар вахтна ужуб къайда уьбхюри кIули гъягъюра. Гьаддиз, учвкан, къайда чIур дарапIди, ичв йишвариин али председателарихъди, райондин ТИК-дин председатель Фридман Асваровдихъди ва комиссияйин имбу гъарашугъарихъди аьлакьайиъ ади, улупнайи йигъари сар-сариз бакар духьну зегьмет зигуб ккун апIураза. Жараси дубхьну ккундар. Ав, дугъриданра вари гьаци дюзди ва хъайи-хъайибси кIули гъабхуз гъийин деврин вари жюрейин шартIар айи 27 УИК-дин дараматари мумкинвал туврахьуз. Ккунди айиб анжагъ, вахтниинди сабсан ражну ул илбицну, халкьдихъди гаф-чIал дапIну, сес тувуб гьарсар касдин буржи вуйибдин, гъийин сесналан закурин гележег асиллу вуйибдин вахтниинди гъаврикк ккаубтIан дар. Архаинвал фтиз кIуруш аьгъдру гъийин заманайиъ сес тувуз яшар бегьем духьнайи живанарихъди хъана артухъдиси ватанпервервалин сюгьбатар духну ккунду. Дурариз интернетдиан дарсар ва кучIлин гафар туври алдатмиш апIурайи тIафларикан узу дарпишра гъавриъ ачва. Аьмлюхъин тIул тазади имиди ккуни йишвахьинди биржуз шулу. Хъа вахтниинди абйир-бабарихъди ухьура дурарин гъайгъушнаъ гъахьиш, ихь закурин йигъ бахтлуб ва ислягьвал айиб хьибди», – субут гъапIнийи райондин главайи.