19-пи мартдиъ Дагъустандин Огни шагьрин округдин администрацияйин главайин вазифйир вахтназ вуди тамам апIуз Жалалудин Аьлирзаев дерккну.

 

 

Жалалудин Исмяилович Аьлирзаев 1958-пи йисан 21-пи декабриъ Табасаран райондин ТIивак гъулаъ бабкан гъахьну. Думу инженервалинна технологйирин, юриствалин ва агрономвалин пишйирин сагьиб ву.

Зегьметнан рякъ 1982-пи йисан Дагъпотребсоюздин жямяаьтлугъ ипIбар-убхъбарин управлениейиъ аьхюну инженерди лихувалилан ккебгъну. 1984-1988-пи йисари думу Дербент райондин ВЛКСМ-дин 2-пи секретарди гъилихну. Мидланра савайи, чан уьмриъ Жалалудин Аьлирзаевдиз гизаф жара гъуллугъариъра лихувал алабхъну.

2006-2015-пи йисари Жала-лудин Аьлирзаев РФ-дин УФМС-дин РД-йин Дербент-диъ айи отделин начальникдин заместительди, хъа 2016-2018-пи йисари Дербент шагьрин администрацияйин главайин заместительди гъилихну.

Жалалудин Аьлирзаев цIийи гъуллугънахъди тебрик апIури, дугъаз чан улихь дивнайи важиблу вазифйир тамам апIбаъ хъуркьувалар ккун апIурача.