Мейлан Нежефов
2018-пи йисхъанмина «Табасаран нурар» газатдиъ хусуси мухбир вуди лихури, гъийинубсиб гъагъи ва уллан нивгъ гъябгъюри гъибикIу макьала адариз…Думу хусуси метлеб айи дявдин операцияйиъ сабпи йигъланмина жюрэтлувал улупури, ва гележегдин гъалибвалик чпин лайикьлу пай киври, 3-пи сентябри талаф гъахьи чвйир Акиф ва Асиф Рамазановарикан вуйиз.
Акиф 1992-пи йисан 4-пи июнди, хъа Асиф 1993-пи йисан 6-пи ноябри Хив райондиъ Заан Яракк Эфенди ва Нарусат Рамазановарин албагу хизандиъ бабкан гъахьну. Адаш автобусдихъ, хъа дада гъулан ФАП-дин гъуллугъчиди лихури, гьялал зегьметниинди гъуландарин арайиъ чпин хизандихьна гьякь-гьюрмат гъазанмиш гъапIу агьлар ву.
Хизандин кIул Эфенди Нежефович 2012-пи йисан вахтсузди уьмриан гъушнийи. Дадайихъди сабси бицIину чвйириз тербия тувувал аьхюну гъардаш Ширифдин гъюнариин алабхънийи.
Багъри гъулан мектебдин 4-пи классдин кьяляхъ Акифди багахьлуйирихь Дербент шагьриъ кадетский корпусдиъ аьгъювалар гъадагъуб давам апIуру. Яшар бегьем гъахьи жигьил, адашдин пише кадабгъну, машиндихъ рулихъ дусру. Армияйин кьяляхъ, 2015-пи йисан дугъу чан уьмур Диана кIуру шурахъди ккабалгнийи. 2021-пи йисан уьлкейин Яракьлу кьувватарихъди контракт йибтIну, 71 полкнан 42-пи дивизияйиъ 58-пи армияйиъ Кьибла дявдин округдиъ Ватандиз гъуллугъ апIуз хъюгъру. Дугъу чан уьмрин юлдшихъди Зухра, Мадина ва Нежеф веледарра тербияламиш апIурайи.
Гъулан мектеб ккудубк1бан кьяляхъ Асифди Каспийск шагьриъ ерлешмиш дубхьнайи техникум ккудубкIуру. 2014-пи йисан эскервалин буржира хътипу жигьили 2015-пи йисан контрактдиин къул дизигну гъардшарихъди зиихъ улупнайи частнаъ Ватандиз гъуллугъ апIуз хъюгъру. 2018-пи йисан думу эвлемиш гъахьнийи. Уьмрин юлдаш Гюлбесдихъди София кIуру риш тербияламиш апIурайи. Бейнавайиз Аллагьди учв кечмиш духьну кьюб сяаьтналан жили велед тувну. Хизандиз гъафи малайикдиин Акифдин ччвур иливну.
***
«Ккудубшу вахтнаъди баярикан фици улхуру?.. Веледари кьаби-кьюци духьнайи абйир-бабар фаракьат апIруси ибшри. Мициб керемет, саб хул’ан кьюр велед адагъру йигъ гафариинди ибариз гъеебхьишра, сар абайинна бабан улариз дярябкъри, я Аллагь. ГьапIза? Фу чара апIуза? Наанди гъягъюза? Сабди сабур тувразуз, йиз улариз дяркъну, веледар багъри ругариина духну cикин дапIнайивали. Наънан пакь гъапIишра, бабан кIваан гьарай гъябгъюру. Гьамускьан жил’ин ислягьвал ибшри… Жан дирбаш баяр дадайин! Ватандиз ширин жанар багъиш гъапIу, игитар дадайин», – ярхи йигъди ва йишвди дадайин ишлариан вуйи гьарай…
«Шубрид чвйирихьнара Ватандиз гъуллугъ апIбан гьиссар учухьна аьхю аба Навруз Рамазановдихьан гъафидар ву. Думу Ватандин Аьхю дявдин иштиракчи вуйи. Донецк областдин гъаравлиъ айча. 3-пи сентябри миллетчйирихъди вуйи нубатнан женгариъ йиз уларикк кьюрид чвйирра талаф гъахьнийиз. Кьюр гъардшин кIулихъ дусубтIан гъагъиб айкIан сарун фана дюн’яйиин?.. Кьисас алдабгъидиза учвлан, душмнар», – кIура чвйирин дердну кабаб дапIнайи, взводдин командир Шириф Рамазановди.
Жарарин сумчир-салам жвуванубси гьисс апIру, хусуси метлеб айи дявдиъ сабпи йигъланмина гьунарар улупурайи дагълу люкьяр, аьхюну сержантар вуйи, кьюр чве уьмриан гъягъюб кIулди хизандиз ва багахьлуйиризси, ухьузра аьхю гуж ву. «Хусуси метлеб айи дявдин операцияйин иштиракчйир», «Дирбаш’вализ лигну» ва жара медаларинна чухсагъул мялум апIбан кагъзарин сагьибар вуйи. ЙикIбахъан Кьягьялвалин орденаризра улупна.
Сабсан ражну башсагълугъвал ккун апIури, Рамазановарин хизандиз кIван сабур ва гъюзимбу йигъар ужувландар хьуб ккун апIурхьа. Дурарин веледарин гележег акуб ибшри!
