Наргиз Гюлечова
25-пи сентябриан 28-пи сентябризкьан Мягьячгъалайиъ «Ачухъ Дагъустан» кIуру Урусатдин туризмйин форум ва «Аьдатар уьрхюрайидар» ччвур тувнайи вари халкьарин арайиъ вуйи художествойин сяняаьткарваларин фестиваль (НХП) кIули гъубшну.
Серенжем лап яркьуди тешкил дапIнайи: дидиъ иштирак хьуз Урусатдин 18 регионариан устадар ва багарихь хьайи гъунши гьюкуматарин – Узбекистандин, Киргизияйин ва Белоруссияйин – вакилар дуфнайи.
«Ачухъ Дагъустан» форум-фестивализ туризмйин цирклиан ужуди артмиш шулайи республикайин муниципалитетари чпи гьясил апIурайи сурсатар хьади дуфнайи. Гьадрарин арайиъ ихь кьюбрид районарра айи. Дидланра савайи, табасаран халкьдин милли сяняаьт уьбхюрайи ва думу артмиш апIбак чпин пай киврайи Къарахановарин ва Гьяжиибрагьимоварин хизанарра чпин кIул’инди иштирак гъахьнийи.
Форум кIули гъябгъюрайи 4 йигъандин арайиъ мина дуфнайи хялариз ихь устадари халачийик гугар китIбаан швнуб-саб ражари мастер-классар улупну.
Форум-фестивалин дахилнаъди Расул Гьямзатовдин ччвурнахъ хъайи Милли библиотекайиъ республикайин Правительствойин председатель Аьбдулмуслим Аьбдулмуслимовдин регьберваликкди туризмйинна халкьарин художествойин сяняаьткарваларин циркил артмиш апIбаз бахш дапIнайи заседаниера гъабхьну. Му серенжемдиъ республикайин премьер-министри мялум гъапIганси, форумдиъ чпин кIул’инди иштирак шулайи касарин ва гьацира гьюкуматарин кьадар йислан-йисаз артухъ шула. Гьамдиинди халкьарин культурайин сяняаьткарваларин шей’арихьна вуйи маракьлувалра артухъ шулайиб рябкъюра.
«Аьдатар уьрхюрайидар» фестиваль – му сяняаьткарвалин шей’ар гьясил апIурайи устадариз чпиз айи тажруба жарадаризра улупуз ва аргъаж шулайи наслар дидихъди таниш апIуз мумкинвал туврайи аьхю майдан ву. Халкьарин художествойин жюрбежюр сяняаьткарваларин кьадарниинди Дагъустан Урусатдин кIакIначи регионси гьисаб апIура. Гьаддиз, республикайин экономикайик чан пай киврайи му циркил артмиш апIбан бадали, дидиъ алахьурайи читин месэлйир гьял дапIну ккунду, цирклиз инвестицйир жалб апIувал чарасуз ву. Хъа инвесторариз кIуруш, ужудар шараитар тешкил дапIну ккунду», – гъапну премьер-министри.
Гьяйифки, аьхиримжи йисари сяняаьткарвалин шей’ар гьясил апIру устадарин кьадар тIубариинди гьисаб апIуз шлуганси цIиб дубхьна. Мисал вуди халачачйир гъадагъурхьа. Гъи ихь районариъ халачи убхуз аьгъю касар лап цIибтIан имдар. Гьаз-вуш жигьилариз му кесп дубгъуз ккунди адар. Натижа пашман апIруб ву – гъи халачачивалин циркил лап зяйиф дубхьна. Саб кIуруб, гьюкуматдин терефнаан кюмек адар, кьюб кIуруб, зигурайи аьхю зегьметнахъ туврайи кьимат лап цIиб ву.
Гъи му ляхин, Мягьячгъала шагьриъ саб бицIи устахана ачмиш дапIну, гьадушваъ халачачивалихъ юкIв хъайи касариз думу кесп улупури, Зарият Гьяжиибрагьимовайи (шиклиъ), хъа Каспийск шагьриъ, «Этностудия» ачмиш дапIну, Назира Нуровайи кIули гъабхура. Му кьюрид дишагьлийирра, халачачивал тарабгъбаъ ва думу артмиш апIбаъ аьхю роль уйнамиш апIури, республикайин фуну пIипIнаъ гьаму жюрейин фестивалар, форумар, ярмаркйир гъягъюраш, гьадушваъ лап аьшкьниинди иштирак шулайидар ву. Гьаддиз «Ачухъ Дагъустан» форумдин ва «Аьдатар уьрхюрайидар» фестивалин дахилнаъди гъабхьи заседаниейиъ Зарият Гьяжиибрагьимова Дагъустандин туризмйинна халкьарин ходожествойин сяняаьткарваларин министерствойи, милли сяняаьткарвал артмиш апIбаз лигну, медалиинди лишанлу гъапIну. Хъа Нурова Назирайи кIуруш, форумдин дахилнаъди кIули гъубшу «халкьарин милли палат» номинацияйиъ табасаран халкьдин дишагьлийирин палтарин чешнйир улупбиинди 3-пи йишван сагьиб гъахьну, ва думура дипломдиинди лишанлу гъапIну.
