Мейлан Нежефов

Хив райондин кIулиъ айи Ярмет Ярметовдин къарарниинди, гъубшу гьяфтайин киш йигъан Хив райондиъ аьхю субботник кIули гъубшнийи.

Гьар йисан сентябрин йигъари субботник кIули гъабхуб райондиъ аьдатнаъ абхъна.

Ярмет Ярметовдин къарарназ кьувват туври ва марццишин апIбан гъаразнаъ ади, гъулари администрацйирин, культурайин хуларин, библиотекйирин гъуллугъчйири, бицIидарин багъарин тербиячйири, мектебарин мялимари, техработникари ва урхурайидари субботникдиъ ужуб иштирак’вал улупнийи.
«Фукьан ужуйи хьибдийи, аьхюр-бицIир дарпиди, гьамци жанлуди марццишин апIбан гъайгъушнаъ гъахьи ухьу, гьаму арайиз гъабхи утканвал гъийихъанминара гъюбхнийиш. Саб гъи ваъ, хъа гьарури чав гъапIуб, гъабхиб марцц апIури, тадабхъуб за апIури гъабхьиш, ихь гъулар-хулар ва табиаьт гъирагъдилан гъафи хялижв касдиз Багъдатси рябкъюйи.

Ухьу сарра сумчир, салам хътрур дархьа. Хъа фунубдин кьяляхъ вушра гъубуз, саризра манигъвал дару йишвахьна дубхну, убгуз шлуб дубгну, миди вуйиб зирзибилиз улупнайи йишвахьна дубхну, дидин эвел дапIну ккун. Гьаз-вуш дидкан ухьуз гьарган кIваин апIури ва марццишин варибдин бин вуйибдикан ктибтури ккундухьуз. Гъит уликкна дубхнайи марццишнан утканвал гьамци уьмаратси уьбхюз ухьуз Худайи амур апIри, дустар», – гъапнийи зирзибил гъабхру машиндихъ хъайи Замирхан Тагъиевди.