Зубайдат Шабанова
Октябрин 7-9-пи йигъари Пакистандин Лахор шагьриъ хили гъурху халачйирин варихалкьарин выставка кIули гъубшну.
Чпиз барабарвал адру успагьи табасаран халачйир хьади, думу выставкайиз Табасаран райондин глава Мягьямед Къурбанов, СикIухъ гъул’ан вуйи, «Халачйирин карван» компанияйин кIулиъ айи Несредин Мягьмудов, Табасаран райондин депутатарин собраниейин депутат, MZ-CARPETS фирмайин генеральный директор, Хюряхъ гъулан вакил Мягьяч Зугьрабов гъушну.
Выставкайиъ табасаран халачйирин стенддиина саки вари агьалйир уч шулайи. Ихь халачйириз Пакистандин Правительствойин халачйир гьясил апIбан ва экспортдин ассоциацияйин председателин сарпи заместитель Захид Назирийи асас фикир тувнийи. Думу табасаран устадарин ляхнарихъди, кюгьне накьишарихъди ва чешнйирихъди таниш гъахьну ва ихь халачйирин ерийиз заан кьимат тувну.
«Табасаран халачи хулаъ лазим вуйи аьдати шейъ дар. Ихь устадари арайиз хурайи гьарсаб халачи чпин рюгьнан марцци гьиссари абцIра, – чан фикрар ачухъ апIура Мягьямед Къурбановди. – Аьсрарианмина уьрхюрайи ихь кюгьне аьдатариин биналамиш духьну, халачачйирин дерин устадвалиинди ухьхьан гъи вари дюн’яйиз машгьур вуйи варихалкьарин халачйирин выставкйириъ иштирак хьуз ва ихь багьалу ирс варидарин улихьна дамагъ кади адабгъуз шулахьухьан. Магьа гьаму выставкайиъра ихь халачйир керхнайи стенддихъна гъафи гьарсар касдин гьяйран шулайи улар рякъруган, кIвак шадвал кабхъру.
Ич асас метлеб ихь устадари урхурайи халачйирихьна вари дюн’яйин жямяаьтлугъдин фикир жалб апIуб вуйич. Учу, коммерцияйин циркил яркьу апIбахъди сабси, кюгьне аьдатар ва багьалу ирс мюгькамди уьбхюри, ихь халачйир варихалкьарин стандартдихъна ва гъийин рынокдин тIалабарихъна хуз рякъяр агурача», – гъапнийи райондин главайи.
Мягьямед Къурбановдин гафариинди, Пакистандиз халачачивалин цирклиан гизаф ужуб тажруба а. Му уьлкейиъ халачйир рас апIру ва пишекарвалин дережайиъди дурариз лигру Халачйирин институт гьяракатнаъ а.
Выставкайиъ Пакистандин вакилари Табасаран райондиъ 2026-пи йисан хьадукра гъябгъру Халачйирин фестивализ иштирак хьувалин теклиф аьхю аьшкьниинди кьабул гъапIну.
Пакистандиан Мягьямед Къурбанов кIулиъ айи табасаран делегация Индия гьюкуматдин Уттар-Прадеш штатдин Бходохи шагьриъ 11-14-пи октябрин йигъари кIули гъубшу «India Carpet Expo-2025» халачйирин вывставкайиъра иштирак хьуз гъушну. Серенжем Индияйин текстильный промышленностдин министерствойин кюмекниинди халачйир экспортдиз гьязур апIру советди тешкил дапIнайиб вуйи.
Индияйиъ гъубшу выставка Азияйиъ варитIан машгьур вуйидарикан ва аьхюдарикан саб ву. Душваъ экспортдиз гьясил апIурайи 225 халачйирин тешкилатари хли гъурху халачйир, кюмсер ва гьалвар сягьнайиина адагъну. Выставкайиз 60-тIан артухъ уьлкйириан 500-тIан артухъ халачйир масу гъадагърудар гъафну. Думу выставкйир тешкил апIбан тажруба ихь делегацияйин вакилари багарихьди ихь райондин ругариин гъябгъру Халачйирин фестивалиъ ишлетмиш апIрувалиин инанмиш вуза.
