Зубайдат Шябанова
12 -пи октябри Табасаран райондин Хючна гъулаъ Кьалухъ Мирзайин ччвурнахъ хъайи спортдин дараматдиъ гвардияйин подполковник Нариман Шихялиевдин гьюрматназ ММА-йиан Дагъустандин Кубокдин ачухъ талитар кIули гъушну. Думу талитариъ Дагъустандин жюрбежюр муниципалитетариан, Чечен ва Кабардино-Балкария республикйириан, жюрбежюр яшарин ва гъагъишнан категорийирин 200-тIан артухъ спортсменар иштирак гъахьну.
Нариман Шихялиев ТIивак гъулан агьали ву. Дугъу Приморский крайиъ гьюлин кьушмарин 155-пи дестейиъ гъуллугъ гъабхури гъахьну. Хусуси метлеб айи дявдин операцияйиъ Нариман Шихялиевди улупу игитвалариз ва кьягьялвализ лигну, думу гьюкуматдин терефнаан хайлин орденариинди ва медалариинди лишанлу гъапIну. Гьяйифки, цци июлин вазли Курский областдиъ урусатдин кьушмарин идара апIру пунктназ душмнари ракетйир деетиган, ихь жюрэтлу офицер Урусатдин Игит Михаил Гудковдихъди зийнариан гъакIну.
Хючнаъ гъахьи талитар Табасаран райондин администрацияйи РД-йин спортдин министерствойихъди ва Республикайин спортдин кчIихбарин федерацияйихъди сатIиди тешкил гъапIдарвуйи. Талитариз, игит эскрин гьюрмат уьбхюб чпин буржиси гьисаб дапIну, Урусатдин жюрбежюр регионариан хайлин хялар дуфнайи. Дурарин арайиъ Приморский крайин Правительствойин председателин заместитель Саид Юсупов ва Приморский крайин губернаторин вари ихтиярар айи вакил Олег Кочнов кIулиъ ади делегация, ва гьацира Курский областдин Рыльск шагьрин глава Сергей Курносов, спортдин гимнастикайиан кьюб ражари олимпийский чемпион гъахьи Светлана Хоркина, игит эскрин адаш Шамсудин Шихялиев кIулиъ ади багахьлуйир ва хизанар, РД-йин спортдин министр Сажид Сажидов, РД-йин Халкьдин Собраниейин депутат Алавудин Мирзабалаев, машгьур спортсменар – юкьяр дисбаан Олимпиадайин кемшрин медалин сагьиб, вари дюн’яйин чемпион Мягьяч Муртазялиев, грекаринна римарин кчIихбариан вари дюн’яйин швнуб-саб ражари чемпион гъахьи Эмирбег Мягьямедбегов, жямяаьтлугъ тешкилатарин вакилар айи.
«Нариман Шихялиевдин гьюрматназ вуйи турнир гьар йисан гъахру яркьу талитариз илтIибкIрувалиин инанмиш вуза. Узу дугъахъди, дугъан хизандихъди багахьди таниш вуйза. Думу, дугъриданна, Ватандиз вафалу эскер вуйи», – гъапнийи чан улхбаъ Светлана Хоркинайи.
Табасаран райондин депутатарин собраниейин председатель Иса Исаевди къайд гъапIганси, Ватан уьбхюри чан уьмур туву Нариман Шихялиев вари жигьилариз ва аргъаж шулайи наслиз нумуналу эскер ва гьякьикьи ватанпервер кьягьял ву.
Рыльск шагьрин глава Сергей Курносовди Нариман Шихялиев, Примоскдин гьюлин пияда кьушмарин кIулиъ ади, Курский областдин ерли агьалйириз кюмекназ дуфну, дурариин алархьу украинайин миллетчйир терг апIбан гьядисйирикан ктибтну.
Официальный пайнан кьяляхъ талитар ккергънийи. Думу йигъан тамашачйир хайлин маракьлу кчIихбарин шагьидар гъахьну. Кубокдин гъалибчйириз медалар, грамотйир ва пулин пешкешар тувну. Заан натижйир улупу спортсменар чемпионвалин чIулариинди ли шанлу гъапIну.
Къайд дапIну ккундуки, ММА-йиан Дагъустандин Кубокдин талитар ккергъайиз шубуд йигъ улихьна гьюлин пияда кьушмарин эскер, подполковник Нариман Шихялиевдин гьюрматназ Санкт-Петербург шагьриъ 777-пи инженервалинна технологияйин мектебдиъ Игитрин парта абццну. Думу йигъан ихь эскрин бабкан духьну 37 йис вуйи. Игитрин парта мектебдин директор ва кечмиш гъахьи ихь игитрин риш, 3-пи классдиъ урхурайи Камиллайи абццну. Игитрин партайиин игитрин шиклар, дугъан дирбашваларикан ва уьмрикан мялуматар кайи къагъзар алди шулу. Дидихъ варитIан ужуйи урхурайи баяр-шубар дитру.
Серенжемдиъ иштирак хьуз хайлин хялар гъафнийи. Дурарин арайиъ Приморский райондин администрацияйин глава Богдан Заставный, военный гъуллугънан ветеранар, эскрар, Дявдинна гьюлин академияйин курсантар, хусуси метлеб айи дявдин операцияйиъ иштирак шулайи эскрарин хизанарин вакилар иштирак гъахьну.
