Зубайдат Шябанова
Гьаму йигъари Табасаран райондин ГьепIил гъулаъ сумчрар ва аьхю серенжемар гъахру «Кавказ» залиъ Табасаран райондин администрацияйин, Гьюкуматдин табасаран театрин кюмекниинди ва Дагъустандин эстрадайин артистарин иштираквалиинди, Дагъустандин лайикьлу артистка Гюльназ Гьяжигъурбановайин концерт кIули гъубшну.
Му мажлиснан гьякьнаан Табасаран райондин глава Мягьямед Къурбановди газатдин вакилариз туву мялуматариинди, билетар масу тувну уч гъахьи вари дакьатар хусуси метлеб айи дявдин операцияйиъ иштирак шулайи эскрариз кюмек вуди хътаиди. Багарихьди Табасаран райондин делегация нубатнан ражари хусуси метлеб айи дявдин операция гъябгъюрайи йишвариз рягьимлувалин кюмек хьади гъягъюз гьязур шула. Дурарихъди ихь эскрариз концертдин программа улупуз табасаран артистарра гъягъиди.
«Къайд апIуз ккундузуз, хусуси метлеб айи дявдин операция ккебгъу сабпи йигъланмина Табасаран райондин агьалйир ихь эскрариз кюмек тувбаъ жанлуди иштирак шула. Муниципалитетдиан 30 миллионтIан артухъ пулин 40 тонна рягьимлувалин кюмек хъадапIна. Думу кюмек уч апIбаъ райондин медицинайин цирклиъ ва муниципалитетдин идарйириъ лихурайидари, жямяаьтлугъ касари, райондин собраниейин депутатари, мялимари ва мектебариъ урхурайи баяр-шубари, бизнесменари ва райондин жара регионариъ яшамиш шулайи ватандашари баркаллу пай кивну. Культарайин идарйирин вакиларра гъирагъдиъ гъузрадар. Магьа гьаму концертдира ихь уьмуми гъалибвал багахь апIурайиваликан ва дурарин юкIв ихь эскрарихъан убгурайиваликан кIура.
Гъубшу йисан хусуси метлеб айи дявдин операцияйиъ иштирак шулайи эскрариз кюмек вуди рягьимлувалин кьюб концерт Дагъустандин халкьдин артист Марьям Къазиевайира тувнийи. Учу рягьимлувалин кюмек хьади ихь эскрарихьна гъягъруган, швнуб-саб ражари Табасаран райондин культурайин идарйирин вакиларра хъади гъушунча. Дурари чпин мяълийириинди ихь эскрарин кIван гьевес хайлин ачухъ апIури гъахьну», – гъапнийи Табасаран райондин главайи.
Гюлназ Гьяжигъурбановайи ич сюгьбатнаъ къайд гъапIганси, рягьимлувалин концерт гъабхбакан дугъан сад йис улихьна кIваъ ният ади гъабхьну. «Хусуси метлеб айи дявдин операцияйиъ иштирак шулайи ихь игитариз
кюмек вуди рягьимлувалин концерт тешкил апIбакан Гьюкуматдин табасаран театрин директор Аьлимурад Аьлимурадовди ва йиз чве Рамисди сад йис улихьна планар йитIури гъахьну.
Сифте учу концерт райондин Ургур чвуччвун ва сар чуччун гъалайиин гъабхуз фикрар апIурайча. Жюрбежюр себебариан концерт октябриз илдипган, чвлин гьавйириз дилигну, Табасаран райондин глава Мягьямед Къурбановди думу ГьепIил гъулаъ «Кавказ» залиъ гъабхбан теклиф дивну. Учу думу залин эйси, меценат Назим Абасовдихьна илтIикIунча. Дугъу концерт гъабхуз зал пулсузди тувну. Дагъустандин эстрадайин машгьур артистарикан кIуруш, думу йигъан концертдиъ иштирак хьуз ккунидарин кьадар лап аьхюб вуйи. Варидариз баракаллагь! Багарихьди Табасаран райондин делегацияйихъди ихь эскрарихьна учура гъягъюз ният дапIнача. Гъит му дяви ухди ккудубкIну, ихь эскрар гъалибвал хьади хулариз хъуркьри», – гъапну Гюльназ Гьяжигъурбановайи.
Рягьимлувалин концертдиъ иштирак гъахьи Дагъустандин лайикьлу артист Аьбдуллагь Мирзакеримовди къайд гъапIганси, гьаму жюрейин серенжемариъ иштирак шули, дугъан сабпи раж дар. «Концертдиз инсанар хайлин дуфнайи. Ав, ихь эскрариз кюмек апIбак гьарсар касди чахьан шлу пай кивну ккунду. Узу швнуб-саб концертдиъ ва рягьимлувалин акцйириъ иштирак гъахьунза. Гележегдиъра гьарсаб кюмекнан акцияйик узхьан шлу пай кивуз гьязур вуза», – гъапну Дагъустандин лайикьлу артист Аьбдуллагь Мирзакеримовди.
Табасаран драмтеатрин директор Аьлимурад Аьлимурадовди рягьимлувалин акцияйин концерт тешкил апIбан даягъ гъахьи Табасаран райондин глава Мягьямед Къурбановдиз ва концерт гъабхуз банкетдин зурба зал пулсузди туву дидин эйси Низами Абасовдиз чухсагъул мялум гъапIну.
«Гюльназ Гьяжигъурбанова швнуб-саб ражари кIул’инди чан хизанарихъди ва, гьацира, Гьюкуматдин табасаран театрин коллективдихъди хусуси метлеб айи дявдин операцияйиъ айи ихь эскрариз рягьимлувалин кюмек тувбаъ иштирак гъахьну. Дугъу женгар гъягъюрайи йишвариз концертдин программа хьади гъягъюз жягьтлувал улупну. Багарихьди Табасаран райондин администрацияйин вакилар рягьимлувалин кюмек хьади гъягъруган, ихь артистарихъди сатIиди йизра, Табасаран театрин артистарра хъади гъягъюз планарик кайич», – гъапнийи Аьлимурад Аьлимурадовди.
