Мейлан Нежефов

30-пи сентябри 70 йис дубхьнайи Хив гъулан агьали Байрамбег Сеферялиев гъулан зиихъ хутIлариъ мал-къарайихъ тIиркIурайир, мархьли кьяши дапIнайи чру укIарилан улчвухну, ягъал кьалилан исина селлер дургъну аьхю дубхьнайи Чирагъ ниризди ахъну. Байрамбег 12 йигъандин арайиъ райондин МВД-йин, МЧС-дин, ЦРБ-йин гъуллугъчйири, саки райондин вари гъулариан, гъунши районарианра агьалйири агури гъахьну. Думу 12-пи октябри гъидихъну ва багъри гъулаъ фаракьат гъапIну.

***

Хив райондиъ «Йиз Дагъустан — йиз рякъяр» проектдин дахилнаъди швнуб-саб гъулан кючйир цIийи алаъна. Гьамусяаьт 240 метр Гашан гъулан ва 335 метр ЧIилихъарин гъулан кючйирин рякъяр рас дапIну ва асфальт улубзну, ккудукIура.

***

Улихьна йигъари Дербент шагьриъ юкьяр дисбаан живанарин арайиъ талитар кIули гъушну. 200-дихьна жигьил спортсменарин арайиъди турнириъ Хиварин гъул’ан вуйи чвйир Асгьяб, Умахан ва Саид Мирзалиеварра иштирак гъахьну. «Гъарз» клубдиъ тренер Камиль Аьбдурягьмановдин хиликк аьгъювалар гъадагъурайи чвйири райондиз нубатнан ражари уьмуми сабпи йишв гъазанмиш гъапIну.

***

Райондин депутатарин 8-пи дихнан сабпи сессия кIули гъубшну. Сессияйиъ депутатарин къарарниинди Садикь Исрафилов председателди, хъа Айдемир Мягьямадялиев секретарди ктагъну.