Гюльнара Мягьямедова
Улихьна йигъари Хив райондин Хирижв гъулан агьалйир, гьадму гьисабнаъди хусуси метлеб айи дявдин операцияйин иштиракчйир, гъулаъ бицIидарин багъ тикмиш дапIну ккудудубкIрайиваликан аьрза хьади, республикайин глава Сергей Меликовдихьна илтIикIнийи.
Аьгьвалат гьамциб ву: 10 йис мидиз улихьна ерли гьюкмари муниципальный бюджетдин дакьатарихъ бицIидарин багъ тикмиш апIуз хъюгъну. Заказчик Хив райондин образованиейин идара вуйи.
Тикилишчивалин ляхнар ккергъну кьюд йислан дараматдиз гъюрайи пулин дакьатар хъадатIнийи, инсанариз туву гаф гьархнийи, тикмиш апIурайи бицIидарин багъ дипну гъубзнийи. Гьамусяаьт дарамат 60% тикмиш дапIна, ва думу тикмиш дапIну ккудубкIну адру дараматарин сиягьнаъ а.
«Гьар йигъан бицIидар хъади райондин центриз гъягъюрайи агьалйирин кIваз аьзаб туври, тикмиш дапIну ккудубкIну адру бицIидарин багъ рабгъура. Дурарин гъаври ахъуз шулу. Ерли гьякимари заказчикдин вазифйир чпин гъюнариина гъадагъруган, агьалйириз тувнайи гафнан жавабдарвалин гъавриъ гъахьундар. Гъи думу месэла ерли гьюкмин дережайиъди гьял апIуз даршлувал рябкъюри, республикайин гьюкмин органарикан «йирси дубхьнайи» месэла гьял апIуб ва бицIидариз цIийи багъ тикмиш апIуб табшурмиш гъапIунза», – дупна Сергей Меликовди чан телеграм-каналиъ .
Дагъустандин главайи сарпи вице-премьер Руслан Аьлиевдиз, бицIидарин багъ тикмиш дапIну ккудубкIайизкьан, му месэла чан гюзчиваликкна гъадабгъуб табшурмиш гъапIну. «Руслан Аьлиевдиз читин проектар уьмриз кечирмиш апIбаъ аьхю тажруба а. Дугъу швнуб-саб ражари ккудукIну адру тикилишчивалин объектар чан гюзчиваликкна гъадагъури, бюджетдин дакьатар кьяняаьтлуди ишлетмиш апIури, вахтниинди ва ужуб ери ади ккудукIну. Гьамусра ужуб натижа шул кIури, умуд кивраза», – бикIура Сергей Меликовди.
Хив райондин глава Ярмет Ярметов 18-пи октябри Хирижв гъулан депутатарихъди, хусуси метлеб айи дявдин операцияйин иштиракчйирихъди гъулаъ бицIидарин багъ тикмиш дапIну ккудубкIбан месэлайин гьякьнаан гюрюшмиш гъахьнийи (шиклиъ). Дугъу агьалйириз бицIидарин багъ тикмиш дапIну ккудубкIну адрувалин себебар ктухнийи. «Дарамат ккудукIну адру тикилишарин сиягьназ гъадабгъна. Райондин кьялаъ бицIидар кьабул апIуз бегьем йишвар айи кьюб багъ айивализ дилигну (гьадрарикан саб Хирижв гъулахьинди терефнаъ ерлешмиш дубхьна), цIийи багъ тикмиш дапIну ккудубкIбан месэла гъюру йисариз бюджетдик кипбанди ву», – гъапнийи Ярмет Ярметовди, агьалйирихъди гюрюшмиш шули.
Му месэлайин гьякьнаан Сергей Меликовди Ярмет Ярметовдиз Мягьячгъалайиз гъюб теклиф гъапIнийи. Мягьячгъалайиан гъафиган, Ярметовди ич газатдиз месэла гьял ап1бан натижйирикан ктибтну. «Гъи [21-пи октябри. – Г.М.] республикайин правительствойин сарпи вице-премьер Руслан Аьлиевдихъди гюрюшмиш гъахьунза. Дугъан гафариинди, Хирижв гъулан бицIидарин багъ тикмиш апIбан месэла Дагъустандин глава Сергей Меликовдин гюзчиваликк кка. Руслан Аьлиевди дарамат тикмиш дапIну ккудубкIбан бадали, кIулиз адагъну ккуни ляхнарин кьимат аьгъю апIуб, гъюру йисан думу ляхнариз пулин дакьатар деетуб тялукь идарйириз табшурмиш гъапIну. Сергей Аьлимовичди 2026-пи йисан бицIидарин багъ тикмиш дапIну ккудубкIуб табшурмиш дапIна», – гъапнийи Хив райондин главайи.
