Гюльнара Мягьямедова
Дагъустандин гьюкуматдин китабар адагъру чапхана 1925-пи йисан 28-пи октябри ДАССР-ин СНК-йин къарарниинди арайиз гъафиб вуйи. Дидиз барабар чапхана я Урусатдиъ, ясана дюн’яйин жара уьлкйириъ сабдиъкьан адар.
Дагъустандин китабарин чапханайи ккудушу аьсрарин ва гьамусдин деврин машгьур аьлимарин, бажаранлу писателарин илимдинна ахтармишарин, справочный ва жара яшайишдин мяна айи литература Дагъустандин 14 чIалниинди, гьадму гьисабнаъди урус чIалнииндира, чап апIура.
Душваъ чап апIурайи китабарин асас мяна Ватандихьна ккунивал, ватанпервервал, халкьарин арайиъ айи чвевал, дуствал, эдеблувал, намус ва гъир’ят уьбхювал ву.
Дагъустандин китабарин чапханайин ляхни КIахаб-Росойиан вуйи Мягьмуддин ва Етим Эминдин мюгьюббатнакан вуйи лирика, Уьмран Батирайин ва Ирчи Къазагъдин кьягьялваликан вуйи шиърар, Гьямзат ЦIадасайин, СтIал Сулеймандин, АбутIалиб Гъафуровдин, ТIагьир Хюругскийин, Эфенди Капиевдин насигьятнан эсерар, дагъустандин фольклор ва ашкьварин яратмишар вари дюн’яйиз машгьур гъапIну.
Дагъустандин китабарин чапханайи Расул Гьямзатовдиз ва Фазу Аьлиевайиз, Аьгьмадхан Абу-Бакариз, Анвар Аджиевдиз, Юсуп Хаппалаевдиз, Кьияс Меджидовдиз, МутIалиб Митаровдиз ва Шамил Къазиевдиз, Хизгил Авшалумовдиз, Бийке Кулунчаковайиз ва Дагъустан машгьур гъапIу жара писателариз ва поэтариз аьхю литературайихьна рякъ ачмиш гъапIну.
Дагъустандин китабарин чапханайи адагъурайи китабарин арайиъ дюн’яйин, урус ва Дагъустан литературайин классикарин таржума гъапIу эсерарира лайикьлу йишв бисура. Гъира Дагъустандин китабарин чапханайи, вариурусатдин, регионарин, республикайин китабарин выставкйириъ иштирак шули, ужудар премйир ва пешкешар гъадагъура.
Магьа гьаму йигъари Дагъустандин китабарин чапханайи учв арайиз дуфну 100 йис тамам хьпан юбилей къайд апIура.
Ихь газатдин ва думу урхурайидарин терефнаан саб аьсрин муддатнаъ хъуркьувалариинди либхурайи ихь чапханайин юбилей мубарак апIури, гележегдиъра дидиз художествойин заан мяна айи, пишекарвалин китабар адагъури, дагъустандин милли культурайин ва литературайин жара апIуз даршлу пай вуди гъубзуб ккун апIурача.
