Мейлан Нежефов

18-пи октябри хайлин йисари Дербент райондин Белижи поселокдин администрацияйиз регьбервал туври гъахьи, хъа гьамус рягьматдиз душнайи Юсуф Аьзизовдин рюгьяриз бахш вуди, ерли администрацияйи волейболин турнир тешкил гъапIну.

Талитариъ Кьибла Дагъустандин мектебариъ урхурайи живанарин ургуб команда иштирак гъахьнийи, гьадму гьисабнан Хив райондианра. Райондиан душнайи командайин жавабдарвал гъабхрур райондин Жямяаьтлугъ палатайин председатель, спортдин гъуллугъчи Айдабег Мазов вуйи. Дугъу ич улхбаъ жи-къиди турнирикан ктибтнийи.

– Сифте рякъюъ посёлокдин администрацияйиз турнир тешкил апIбаз чухсагъул пуз ккундузуз. Гизаф ужуйи кьабул гъапIунчу.

Инсан, чакан улхури имбукьан гагьди, йикIурдар. Чав гъапIу ужудар ляхнар-карариинди думу гьарган халкьдин хиялариъ гъузру. Юсуф Аьзизович гьацдар рягьимлу касарикан вуйиб, дугъан уьмрикан кьатI’иди ктибту дугъан ярар-дустарин гафар-чIалариан мялум гъахьунчуз.

Вари командйир турнириъ жанлуди иштирак гъахьну. Сабпи йишв Хив райондин командайиз, кьюбпи йишв Белижийин, хъа шубубпи йишв Кьурагь командайиз кьисмат гъабхьну.

Турнирин вари иштиракчйириз кIваинди гъузру пешкешар, хъа гъалиб гъабхьи ва пешкешнан йишвар гъазанмиш гъапIу командйир грамотйириинди, кубокариинди, тупариинди ва пулиинди лишанлу гъапIну.

Турнирин натижйириз асас вуди, ихь райондин командайин вакил Ислам Рамазанов «варитIан ужур спортсмен» ччвурназ лайикь гъахьну. Гьацира, ихь командайиз кьувват вуди волейболиз тамаша апIуз гъафи ва узухъди сабси командайихъ зегьмет гъизигу багъри райондин жигьиларин арайиъ спорт артмиш апIбак чпин пай киврайи Эльнар Гьямзатовдиз, Назим Мягьямедкеримовдиз ва Артур Нурмягьямедовдиз аьхю чухсагъул кIураза.

Йиз фикриан, гьаму турнириъ гъахьи цIийи таниш’валарира, дуствалин таза аьлакьйирира талитарин гьарсар иштиракчийин уьмриъ аьхю йишв бисиди. Дуствал абйириланмина ухьухь гъубзнайи девлет ва эл-аьдат ву, – гъапнийи дуствал чан уьмриъ аьхю хазнаcи гьисаб апIурайи Айдабег Мазовди.