Наргиз Гюлечова

21-пи октябри Дагъустандин «Анжи Арена» стадиондиин «Динамо» Мягьячгъала ва «Спартак» Москва футболин командйирин арайиъ талитар гъахьнийи. Думу матч Урусатдин Кубокдин дестйирин аьхиримжи турин дахилнаъди кIули гъубшуб вуйи.

Командйирин арайиъ вуйи уйнамишдин кIулин судья Нальчик шагьриан дуфнайи Инал Танашев вуйи.

Сабпи тайм ккебгъну, 25-пи дакьикьайиъ «Динамойин» футболист Хазем Мастурийи «Спартак» командайиз сабпи гол ипну, уйнамишдин гьисаб абццнийи.

Футболин матч Дагъустандиъ гъябгъюрашра, «Спартак» командайихъди дуфнайи гьевескрарин кьадар аьхюб вуйи. ИкибаштIан, футбол ужуди уйнамиш апIуз чпин командайик дурари яман аьшкьра капIрайи. Магьа 34-пи дакьикьайиъ «Спартакдин» футболист Маркиньосди «Динамойиз» гол ипну, гьисаб 1:1 гъапIнийи, ва гьадму гьисабниинди сабпи таймра ккудубкIнийи.

Кьюбпи тайм ккебгъну, 59-пи дакьикьайиъ Никита Массалыгайи ва 68-пи дакьикьайиъ Игорь Дмитриевди «Динамойин» вратарь Давид Волкдиз кьюбсан гол ирчнийи. Натижайиъ 1:3 гьисабниинди «Спартак» гъалиб гъабхьну.

Урусатдин Кубокдин «C» дестейиъ 1-пи йишв’ин «Спартак», хъа 2-пи йишв’ин «Динамо» Мягьячгъала ал.