Наргиз Гюлечова
Каспийск шагьриъ октябрин аьхиримжи кьюд йигъан халкьарин арайиъ вуйи Каспийин цифровой форум кIули гъябгъиди. Форум ихь региондиъ тешкил апIури цци 3-пи раж ву.
Цци республикайиз форумдиъ иштирак хьуз Урусатдин 15 региондиан 1 агъзурихьнакьан иштиракчйири аьрза тувна. Мидин гьякьнаан РД-йин цифровой артмиш’валин министр Юрий Гьямзатовди хабар тувра.
Саб гъапиб, вари дюн’яйин мяна айи IT цирклиан вуйи аьхю форум Дагъустандиъ гъабхурайивалин себеб гъи ихь республикайиъ IT цирклиан ужудар хъуркьувалар улупурайи баяр гизаф айивал ву. Кьюб гъапиб, 7 йис хъади-хъади «Кавказ» кIуру Урусатдин интернет-форум (РИФ. «Кавказ») Дагъустандиъ гъабхури гъахьну. Саб гафниинди, му жюрейин форумар тешкил апIури, дурар кIули гъахуз республикайиз ужуб тажруба а. Гьаму далилар гьисабназ гъадагъну, ва гьацира Урусатдин Президент Владимир Путиндин «Кафари – Кьибла» халкьарин арайиъ вуйи транспортдин коридор артмиш дапIну ккунивалин табшуругъра себеб вуди, форум вари халкьарин арайиъ вуйи дережайиз илтIибкIну, думу Дагъустандиъ гъабхбан йикьрар гъапIну.
– 2023-пи йисан форум сабпи ражари республикайиъ гъабхурайиган, дидиъ иштирак хьуз ухьухьна харижи уьлкйирихъди ляхин гъабхру Урусатдин министерствойиан (МИД) вакилар гъафнийи. Гьаддин кьяляхъ, Каспий гьюлин гъирагъдихъди хъайи гьюкуматарин месэлйир гьял апIру комиссияйин заседаниейиъ МИД-дин министр Сергей Лавровди му форум мяна айиб, уьлкейиз лазим вуйиб ва гьар йисан дубхну ккуниб вуйиваликан гъапнийи. Гьаддихъанмина магьа гьар йисан форум гъабхбан йикьрар дапIна, – гъапну министри.
Ккудушу йисариси, ццира форумдиъ Каспий гьюлин гъирагъдихъди хъайи гьюкуматариан – Ирандиан, Казахстандиан, Узбекистандиан – вакилар иштирак хьиди. Кьюд йигъандин арайиъ Дагъустандиъ гъябгъру Каспийин цифровой форумдин иштиракчйириз гизаф маракьлу программа гьязур дапIна. Каспий гьюлин гъирагъдихъди хъайи гьюкуматарина ихь уьлкейин регионари, цифровой экономика артмиш апIувалин метлеб ади, жюрбежюр проектар сатIиди уьмриз кечирмиш апIбан месэлйир гьял апIуз чалашмиш хьиди.
– Тартиб дапIнайи программайиинди, форумдин иштиракчйири сюгьбатар гъахру секцйир, махлукьатлу хабрариан тувру кучIлин мялуматарихъди женг гъабхбан месэла гьял апIбан заседание хьибди. Мидланра савайи, форумдин дахилнаъди экологияйин мониторингдин ва цифровой энергетикайин, вари халкьарин арайиъ вуйи транспортдин коридор «Кафари – Кьибла» темйирианра гаф-чIал апIиди, – ачухъ гъапIнийи Юрий Гьямзатовди форумдин программа.
КIваин апIурхьа: сач форумдин дахилнаъди Дагъустандин министерствйиринна ведомствйирин вакиларикан ва республикайин хяларикан ибарат вуйи командйирин арайиъ хоккейин талитра гъабхьнийи. Хоккей апIру миркк али майдан Мягьячгъалайин «Парамакс» кинотеатрин аьтрафариин ал. Душваъ хоккейиан уйнамишар ццира гъягъиди. Му ражну Дагъустандин команда спецназдин вакиларикан дюзмиш дапIнайиб ву.
Форумдикан вуйи мялуматар тувуб давам апIури министри гъапиганси, серенжемдин дахилнаъди Урусат, Узбекистан, Иран ва Казахстан гьюкуматариан вуйи командйирин арайиъ хакатонра хьибди, Каспийск шагьрин «Москва» кинотеатрин гьяятдиъ форумдиз уч духьнайидариз завлан тIирхурайи дронар саб тмунубдихъ хъивбан талитра улупиди.
