Гюльнара Мягьямедова
Дагъустандин агьалйирин сагъламвал уьбхру министерствойи полиомиелитдиз аькси рубар йивбан кампания ккебгъна.
Дидин гьякьнаан 11-пи ноябри «Дагъустан» РИА-йин пресс- конференцйир гъахру залиъ РД-йин агьалйирин сагъламвал уьбхбан министрин сарпи заместитель Патхула Патхулаевди, Республикайин сарикан тмунурикна тарагъру уьзрарин ва СПИД-дин центрин эпидемиологияйин отделин начальник Мурад Гьяжиевди, Роспотребнадзорин РД-йиъ айи идарайин кIулиъ айирин заместитель Ирина Алжанбеговайи, духтир-эпидемиолог Ажий Аьлиевайи журналистариз мялуматар тувну. Республикайин сагъламвалин министерствойин гъуллугъчйири полиомиелит уьзрин хатIалуваликан, дидхьан бицIидар уьрхбан жюрйирикан ктибтнийи.
«БицIидар ихь жямяаьтлугъдин варитIан назук пай ву. Гизафдариз полиомиелитдиз аькси рубар йивну ашра, хайлиндар думу рубар йивну адрударра гъузна. Учу учвухьна, гьаму месэлайихьна важиблуди янашмиш хьуб ккун апIури, илтIикIурача.
Советарин деврин вахтна варидариз рубар йивури, ихь уьлкейиъ полиомиелитдин вирус ккабгънийи. Хъа Афгъанистан, Пакистан ва гьацдар жара уьлкйириъ думу вирусдиан аьзарлу шлудар ими. Гьадму уьлкйириан туристар гъюри, ихь республикайиз хатIалувал гъубзра.
Республикайин вари районариз вакцинайин лазим вуйи кьадар дубхна», – гъапнийи Патхула Патхулаевди.
Мурад Гьяжиевдин гафариинди, республикайиз вакцинайин миллиондилан зиина дозйир духна.
«Швнуб-саб жюрейин дармнар духна: Пентоксин, инактивированный поливалентный вакцина (сабпиб ва кьюбпиб) ва чIиви поливакцина. Иммунизацияйин кьюб пай гъахбан бадали лазим вуйи кьадар дармнар а», – гъапнийи дугъу.
Полиомиелитдиз аькси рубар 3 ваз дубхьнайи бицIидарихъан хъюгъну 14 йисна 11 ваз вуйидариз йивура. Вакцинацияйин сабпи пай 10-пи ноябри ккебгъну 15-пи ноябриз ккудубкIбанди ву, хъа кьюбпи пай 15-пи декабрихъан 19-пи декабризкьан давам хьибди. Вакцинайин руб поликлиникйириъ, мектебариъ, бицIидарин багъариъ ва аьлава пунктариъ пулсузди йивуру.
Кампанияйин метлеб региондиъ айи эпидемиологияйин аьгьвалат къайдайиз хуб, вирус тарабгъувал дебккуб, коллективдин иммунитет арайиз хуб ву. Кампанияйин тешкилатчйири абйир-бабарикан вакцинайин рубар йивбан ляхнихьна жавабдарвалиинди ва вахтниинди илтIикIуб ккун гъапIнийи.
Республикайин образованиейин идарйириъ духтрарихъди гъаврикк ккаъбан гюрюшмишар гъахура. Сагъламвалин Министерствойин ва Роспотребнадзорин пишекрари бицIидарин абйир-бабариз вакцинайин хатIасузваликан, рубар йивбан къайдайикан, руб йивбан кьяляхъ бицIирин бедендин аьгьвалатнакан ктибтура.
Эгер бицIидарин багъариъ ва мектебариъ, медицинайин кабинетариъ вакцинайин рубар йивбахъди аьлакьалу суалар арайиз гъафиш, абйир-бабарихьан чпи гъягъру поликлиникйириз, ясана Минздравдин сайтдиъ чап дапIнайи «горячий линияйин» телефондин номериз зенг апIуз шулу.
КIваина хурача: полиомиелит инсандин нервйирин гъурулушдиз чIуруди тясир апIру вирусдин уьзур ву. Думу уьзур, бедендин сагъвализ дилигну, рягьятди улдубчIвузра мумкин ву, хъа гъагъиди уьзур кубчIвдар сакьат духьну гъузру, ясана кечмиш шулу.
Вакцинайин рубди уьзрихьан мюгькамди уьрхюру.
