Наргиз Гюлечова
Гьамусяаьт мектебариъ урхурайидарин арайиъ «Гележегдиз гам» конкурсдин муниципальный эпап кIули гъябгъюра. Му конкурс гьар йисан асас вуди 7-пи классдиан 11-пи классдизкьан урхурайи бицIидарин арайиъ гъабхурайиб ву. Конкурсдин метлеб мектебдиъ урхурайи баяр-шубарин зигьимдин яратмиш’валар артмиш апIури, дурар илимдин ахтармишарихьна жалб апIуб ву.
Улихьна йигъари Кас-пийскдиъ «Гележегдиз гам» конкурсдин муниципальный этапдиъ Анвар Гьяжиевдин ччвурнахъ хъайи 12-пи нумрайин гимназияйиъ лихурайи мялим, ихь ватанагьли Нариза ТIайибовайи ва дугъан хиликкди урхурайи Пери Мамедовайи сатIиди гьязур гъапIу проектдиз 1-пи йишв тувну. Нариза ТIайибова Хив райондин ГъуштIил гъул’ан ву, Хъа Перийин адаш Хив гъул’ан ву. Наризайи Каспийскдин 12-пи нумрайин мектебдиъ физикайин дарсар кивра. Хайлин ватхна Волгоградский областдиъра ляхин апIури гъахьну.
Нариза ТIайибовайина Перийи гьязур гъапIу проект энергия тувру аьлава дакьатариз бахш дапIнайиб ву. Дидиъ табиаьтдиз зарар тувру нафт ишлетмиш дарапIди, электроэнергия гьясил апIуз айи жара мумкинваларикан дупна.
«Аьхиримжи йисари Дагъустандиъ аквар кутIушвру дюшюшар гизаф шулайивализ лигну, му аьгьвалат дигиш апIбан бадали, фицдар рякъяр агуз шулуш, ахтармишар гъахуз хъюгъюнза. Хайлин ахтармишарин кьяляхъ, микIлахъди энергия гьясил апIуб региондиз варитIан хас шлубдин гъаври гъахьунзу. Гьаддиз узуна 11-пи классдиъ урхурайи Пери, Тарки дагъдиина душну, душв’ин микIлахъди либхру электростанция диври гъабхьиш кIури, хъиврайи микI хусуси алатдихъди ахтармиш апIуз чалашмиш гъахьунча. Саки йисандин арайиъ духнайи ахтармишарин натижйириинди, дагъдиин хъиврайи микIран кьувват секундайин арайиъ 11 метртIан артухъ вуйиб аьгъю гъабхьнийчуз. Эгер Тарки-тау таблиин микIлахъди либхру саб генератор дивиш, диди дишлади чан кьувват за дапIну, 2 112,102 кВт энергия тартиб апIуру.
Гьаму ич ахтармишар вари ачухъди улупну, йиз хиликкди гьязур дапIнайи проектдикан Перийи конкурсдиъ ктибтнийи, ва жюрийиз ич ляхин лап кьабул гъабхьнийи», – кIура Нариза ТIайибовайи.
Муниципальный этапдин натижйириинди тяйин гъахьи республикайин гьарсаб шагьриан ва райондиан вуйи гъалибчйир ноябрин вазли республикайин этапдиз уч хьиди.
Гьамусяаьт йиз макьалайин игитра душваъ иштирак хьуз гьязур шула. Дурари, республикайин дережайиъдира 1-пи йишв гъадабгъну, чпин проект хьади федералин дережайиз удучIвур кIури, умуд киврача.
