Наргиз Гюлечова
8-пи ноябриъ Мягьячгъалайин «Дуствалин хулаъ» халкьарин дуствализ бахш вуйи «Дагъустан варидарин хал ву» ччвур тувнайи фестиваль кIули гъубшну. Думу фестиваль фици арайиз гъафиб вуш, фукьан инсанар дидиз уч гъахьнуш, улихьна йигъари РД-йин милли политикайинна динлин ляхнариз лигру вахтназ вуди дерккнайи министр Тамерлан АбутIалимовди ва Урусатдин «Уьру Хач» Дагъустандин отделениейин кIулиъ айи ихь ватанагьли Раиса Шагьсиновайи ктибтнийи.
Къайд дапIну ккундуки, фестиваль Дагъустандиъ кIули гъабхури цци кьюбпи йис ву. Гьаму йисан иштиракчйирин кьадарра сад агъзуриланзина артухъ гъабхьнийи.
Пресс-конференцияйиз уч духьнайи журналистарин суалариз жаваб туври Тамерлан АбутIалимовди гъапиганси, Палестинайин агьалйир Дагъустандиз гъюбан кьяляхъ, гьадрар ихь республикайихъди таниш апIбан метлеб улихь дивну, грантарин проектарин конкурсдиъ Урусатдин «Уьру Хач» Дагъустандин отделениейин проект 2024-пийисан гъалиб хьуб’инди, ццира фестиваль кIули гъабхуз мумкинвал гъабхьну.
«Ккудубшу йисан, грантдин дакьатар адаршра, фестиваль гъабхьнийи. Думугандин фестиваль асас вуди Палестинайиан дуфнайидарин ва Дагъустандин халкьарин арайиъ кIули гъубшнийи. Сач серенжемдиъ иштирак хьуз гъафи, Дагъустандин вузариъ урхурайи харижи уьлкйирин агьалйири хъанара му жюрейин серенжем тешкил апIбак умуд кивнийи. Гьаддихъан сарун, дагъустанарси, харижи уьлкйириан дуфну, ихь республикайиъ яшамиш шулайидарра иштирак шули, фестиваль гьар йисан гъабхбан йикьрар гъапIунча», – гъапнийи Тамерлан АбутIалимовди.
Мидланра савайи, вахтназди вуди министрин вазифйир тамам апIурайи Т.АбутIалимовди къайд гъапIганси, фестивалин тешкилатчйири чпин улихь гьял дапIну ккуни швнуб-саб месэла дивну. Сабпи нубатнаъди халкьарин арайиъ мясляаьтна сабвал ижми апIуб ва ватанпервервалин гьиссар артмиш апIуб ву. Хъа фестивалин варитIан асас метлеб жара халкьарин культурайихъди таниш хьуз ккуни жигьилар, Урусатдин ва Дагъустандин гележег бадали тербияламиш апIуб ву.
Цци фестивалиъ Дагъустандиз урхуз Индияйиан, Африкайин уьлкйириан ва гъунши гьюкуматариан дуфнайи агьалйирра, 50-тIан артухъ палестинарра лап аьшкьлуди иштирак гъахьнийи. Гьаму йисан му яркьу серенжемдин тешкилатчйири республикайин муниципалитетаризра дих гъапIну.
Чан улхбаъ Раиса Шагьсиновайи, фестивалиъ иштирак хьубанди, Мягьячгъала, Дербент шагьраринна, Табасаран, Хив, Рутул, Дахадаев, Гергебиль ва Мягьярамкент районарин яратмишарин коллективариз ва республикайин вари медицинайин колледжариз чухсагъул мялум гъапIну.
«Гьаму йисан фестивалин иштиракчйириз муниципалитетари гьязур дапIнайи халкьарин художествойин сяняаткарваларин – халачачивалин, ювелирварлин, ругдин шей’ар апIбан мастер-классарра улупну. Мидланра гъайри, Дагъустандин халкьарин хинкIар апIбаанра мастер-класс гъабхьну. Хъа уч духьнайидариз варитIан кьабул гъабхьиб Г.А. Илизаровдин ччурнахъ хъайи Дербентдин медицинайин колледждин студентари гьязур гъапIу чарвайин бирган вуйи», – аьлава гъапIну Раиса Шагьсиновайи.
Конференция аьхирихъна гъюри, Тамерлам АбутIалимовди гьамусдихънтина фестиваль СКФО-йин регионарин арайиъра гъябхруси яркьу апIуз рякъяр агбаканра гъапнийи.
