Умгьанат Сулейманова
Гъубшу гьяфтайи ихь уьлкейиъ РФ-йин айтIан ляхнарин органарин гъуллугъчийин йигъ къайд гъапIнийи. Думу йигъ 1917-пи йисан 10-пи ноябри Урусатдин айтIан ляхнариз лигру Халкьдин комиссариатдин къарариинди тяйин гъапIну, хъа машкварси думу 1962-пи йисланмина тяйин дапIна. ХатIасузвал уьбхюрайи тешкилатариъ хайлин думу читин пишейин эйсйир – халис жилар, ватанперверар лихура. Дурарикан сар Дербент шагьриъ ГИБДД-йин начальникдин заместитель Темирлан Гьяжиев ву. Узухъди вуйи сюгьбатнаъ дугъу чан ляхнин гъайгъушнарикан ктибтну.
Темирлан Мирзагьясанович Гьяжиев Дербент шагьриъ 1986-пи йисан бабкан гъахьну. Думу, 2003-пи йисан мектеб ккудубкIну, ДГПУ-йиъ правойин факультетдик урхуз кучIвру. Университет аьгъювалариинди ккудубкIну, 2008 пи йисан чан ватандаш’валин буржи тамам апIуз гъягъюру. Армияйин жергйириан гъафи Темирлан Мягьячгъалайиъ ДПС-дин полкнан аьхюну инспекторди ляхниъ учIвру, хъа 2019-пи йисан думу «Кавказ» федеральный рякъ’ин гъуллугъ гъабхурайи 9-пи взводин ДПС-дин полкнан инспекторди тяйин апIуру.
Темирлан Гьяжиев гизаф савадлу, бажаранлу ва фуну ляхинра кIулиз адабгъуз удукьру гъуллугъчи ву. Думу жвувахьна ва чаина ихтибар дапIнайи ДПС-дин взводин гъуллугъчйирихьна тIалаблувалиинди янашмиш шули гъахьну. 2023-пи йисан Темирлан Дербент шагьриз ГИБДД-йин начальникдин заместителди гьаъру. Чан ляхнин вазифйир лап дериндиан аьгъю ва дурар намуслувалиинди тамам апIру, читин дюшюшнаан ухди ва лайикьлуди кIул адабгъуз аьгъю, «1-пи классдин пишекар» квалификация айи аьхюну лейтенант Темирлан Гьяжиевди Дербент шагьрин ГОВД-йин коллективдиъра аьхю гьюрмат гъазанмиш дапIна.
Темирлан Гьяжиевди кьатI’иди чахъди Дербент шагьриъ ГОВД-йиъ гъуллугъ гъабхурайидарин жавабдарваликан, гъийин уьмриъ алахьурайи читинваларикан гьамци ктибура.
– Дугъриданна, гъийин девриъ варитIан хатIалу вуйиб айтIан ляхнарин органариъ лихурайидарин пише ву. Дици гьаз кIурава гъапиш, тек саб дюшюштIан кIваин апIудархьа: 2024-пи йисан 23-пи июндин вазли Мягьячгъала ва Дербент шагьрариъ гъагъи терактари ва террористарин хил’ан гъахьи хъана жара тахсиркарвалари 15 къанун уьбхру органарин гъуллугъчйир, дурарихъди хъана ислягь агьалйирра уьмрихъ мягьрум гъапIну.
Узуз йиз гъуллугъ гизаф кьабулди вузуз. Йиз ляхниъра, жара ляхниъси, читинваларра шулу, хъа читинвал адруб фуну ляхин ахъа? Ляхниъ алахьру гъагъи дюшюшариан кIул адабгъуз аьгъюди ккунду. Жвуван буржйир намуслувалиинди тамам апIруган, юлдшаринра, аьхюдаринра арайиъ гьюрмат ади шулу. Хъа рякъюъ сар нярсвал кайи кас кьисмат гъахьиш, фукIара апIуз шулдар. Улубкьуз ккайибдиккан ккудучIвуз шлуб дар.
Хъа ГИБДД-йин гъуллугънаъ айидари машинар хъаърударин, жара ватандашарин хатIасузвал уьбхбаъ аьхю роль уйнамиш апIура, иллагьки гъийин рякъяриъ гьяракатниинди хъаъру автомобиларин кьадар йигълан-йигъаз гизаф шулайиган. Шагьрин айитI шулайи аьхюну пай аварйириъ яягъди гъягъюрударин чпинра тахсрар а, гьаз гъапиш дурар кми-кмиди чпиз улупнайи рякълан дарди, жара йишвлан гъягъюри шулу. Ва натижайиъ аварияйиъ ахъру. Ички дубхъну машин хъапIруган шлу аварйирира гъи асас йишв бисура. Гьар йисан ГИБДД-йин жягьтлувалиинди Дербент шагьриъ «Ихтият йихьай, бицIидар!», «Автобус», «Хулаъ увуз яв хизан ккилигура» ва жара операцйир гъахури шулча.
Хъа рякъярин ихтиятвалин къайда уьбхюрайидар, гьелбетда, ГИБДД-йин гъуллугъчйир ву. Машин хъапIрайидарира фукьан вушра гъалатIар деетуру, гьадрарра аварйирин тахсиркрар ву. Ихь саспи шоферариз учу думукьан ккунди шулдар. Хъа ккундар дупну, жвуву гъуллугъ апIурайи шагьрин къайда уьбхюб лазим дарин?
Къайд дапIну ккундуки, айтIан ляхнарин органариъ лихурайидарин адресназ ужувлан гафарра, хъа бязи вахтари тянкьид апIру гафарра ерхьури шулу: «полицейскйири ухьуз фу кюмек апIурахъа», «дурари ихь журум апIуру», «ухьу дустагъ апIуру»… Вари сабишв’инди гьисабназ гъадабгъиш, учу ихь Дербент шагьрин агьалйирин мугъаятвал уьбхюз учхьан шлуб вари апIурача. Гьамусяаьтна федералин рякъяриъ гизаф лап гъагъи аварйир шула. Хъа жвуван шагьриъ, кючйириъ машин дюзи къайдайиинди хъапIуз даршлу шофери, федеральный рякъяриъ фици хъапIур, кIури хиял вуйичв? УлихьдитIан гьамус рякъяриъ шулайи аварйириъ йихурайидарин кьадар гизаф ву.
Хъа гъийин машквран йигъан харжибдикан пидархьа. Гъи ич машквар ву, му читин пишекарвалин машкврахъди тебрик апIураза сифтена-сифте йиз гъарашугъар, хъасин жара йишвариъ лихурайи ихь ватанагьлийирра. Гъит гьарган дюн’яйиъ ислягьвал ва халкьарин арайиъ мясляаьт ади ибшри.
