Жямяаьтлугъ сагъламвал мюгькам апIури, му цирклиъ лихурайи аьлимари саб жерге уьзрар терг апIбан жигьатнаан кьатI’и уьлчмйир кьабул дапIна.
Натижайиъ улигьдин деврариъ гъулар, хулар ккадахьбан себебар вуди гъахьи кIамкIар, битIар ва хайлин жара уьзрар терг апIру ясана дурар ачмиш хьпан дюшюшар кам апIру мумкинвал гъабхьну. Амма, гьяйифки, бала хабар адру йишвхьан гъюру кIуруганси, гъи агьалйирин юкIварик сикинсузвал кипру цIийи уьзур арайиз дуфна.
Коронавирус себеб вуди, гъи ухьу дюн’яйин жюрбежюр пIипIариъ инсанар гъирмиш шулайивалин шагьидар духьнахьа. Урусатдин сагъламвал уьбхбан Министерствойин улупбариз асас вуди, дидиз аькси дарман гьясил апIбиин аьлимар машгъул духьна. Натижйирра а кIура, хъа гьелелиг думу дарман кьувватнаъ ипнадар.
Урусатдиъ коронавирусдиан аьзарлу духьнайидарин кьадар Европайин саб жерге жара уьлкйириътIан цIиб ву, вушра думу кьадарра йигълан-йигъаз артухъ шула.
Варидариз мялум вуйиганси, уьзур тарабгъбаз аькси серенжемар кьабул апIбан метлебниинди Урусатдиъ сифте саб гьяфтайиз вуди карантин мялум гъапIну, хъа арайиз гъюрайи гьякьикьат фикриз гъадабгъну, думу вахт хъана гьидирфбан мумкинвалра а.
Агьалйир коронавирусдихьан уьрхбан, дурариз сагъламвалин лазим вуйи кюмек тувбан жигьатнаан йишвариин сикин дарди гьязурлугъар гъахура.
Хив ЦРБ-йин кIулин духт-рин сагъламвалин месэлйириз лигру заместитель Наида Пашаевайи субут апIурайиси, вари Урусатдиъ гъахурайи гьяракатариз асас вуди, дурарира йишв’ин лазим вуйи уьлчмйир кьабул апIура.
– Коронавирус уьзур, ухьу вари шагьидар вуйиси, гъи вари уьлкейиъ тарабгъна. Думу вирус тарабгъувалихъди аькси женг гъабхбан метлебниинди Хив ЦРБ-йиъ, айи мумкинвалариз лигну, терапияйин отделениейиъ 15 аьзарлу кьабул апIру обсервация гьязур дапIнача. Душваъ му вирус кайивалин шак кайидар ва дурарихъди аьлакьайиъ гъахьи ватандашар кьабул апIиди. COVID-19 уьзур кайиб тасдикь гъабхьи аьзарлуйир кьабул апIбан метлебниинди ва РД-йин Минздравдин коронавирусдиан аьзарлу гъахьидариз кюмек тувбан гьякьнаан вуйи буйругъназ асас вуди, СтIал Сулейман райондин Кьасумкент гъулаъ тялукь госпиталь гьязур дапIна. Уьзур кубчIву Хив райондин агьал-йирра улупнайи госпитализ гъахиди. Хъа жара инфекцйириан аьзарлу духьнайи райондин ватандашар Хив ЦРБ-йиъ кьабул апIиди.
Улупнайи вахтназ райондиъ коронавирус кайивал тасдикь дапIнайи дюшюш адар. Му уьзур яркьуди тарабгънайи Англияйиан дуфнайи юкьур ватандаш гюзчиваликк ккайич. Уьзур ачмиш хьпаз улупнайи муддатназ асас вуди, 10 йигълан дурарин анализар гъадагъиди. Дурарра уьзрихьан марцциди шлувалик умуд кивурхьа, вушра агьалйир ихтиятди хьпаз аьхю мяна а.
Гъи райондиъ му уьзур кайир адар дупну, архаин духьну ккундар. Фицики инсанар гьар вахтна гьяракатнаъ а. Урусатдиъ мялум дапIнайи карантин себеб вуди, уьлкейин жюрбежюр пIипIариъ урхурайидар, гъазанмиш апIуз душнайи касар гъулариз хъадакну гъюра. Му гьякьикьатди эпидемияйин аьгьвалат гъизгъин апIуз гъибтбан аьхю хатIа а. Агьалйирихьна илтIикIури, пуз ккундузуз: жара регионариан учву дуфнайивал жин мапIанай! Учвухъди ичв багахьлуйир, дустар хатIайикк миккитанай! Уьзур каш ясана ктарш мялум апIуз улупнайи 14 йигъандин муддатназ сарихъдира аьлакьайиъ муучIванай! Гьюрматлу ватанагьлийир, хулариан чарасузвал адарди муудучIванай! Му уьзрихъди арайиз дуфнайи аьгьвалатнаъ ихь сагъламвал ухькан гьарсарикан асиллу ву. Духтрар, айи мумкинвалариз лигну, кюмек тувуз гьязур ву, вушра ихтият йихьай. Марццишин уьбхяй!
Коронавирус уьзур арайиз гъюбахъди аьлакьалу вуди райондин ЦРБ лазим вуйи алатарихъди тямин вуйиваликан гъулхиш, больницайиъ 350 маска а, амма дурар саки сагъламвал уьбхбан пишекрариз сад йигъазкьан гьуркIудар. Учу жунайикан маскйир дирхурача. Реанимацияйин отделениейиъ кьюр реаниматолог лихура. Душваъ кьюб ИВЛ аппаратарра а. Дурар ихь агьалйириз лазим даршул дупну, умуд кивурхьа. Вушра уьзриз аьксивал улупуз гьар дакьикьайиъ гьязурди гъузувал чарасуз лазим ву, – аьлава гъапIну дугъу.
