Коронавирусдин уьзур яркьуди тарабгъувалихъди аьлакьалуди карантин мялум дапIнайиивализ лигну, Дагъустан Республикайин Глава Владимир Васильевди, налогар туврударин тереф уьбхбан ва республиикайин яшайишдинна экономикайин мюгькамвал за апIбан бадали, бицIи ва кьялан дилаварчивалин тереф уьбхбан уьлчмйирикан мялумат тувну.

 

 

Мидин гьякьнаан вуйи Указдиин мартдин 31-пи йигъан къул гъизигну.

Думу Указдиз асас вуди, рягьят жюрейин налогар илирчнайи дилаварчйири туврайи налог 6%-дилан 3%-диина, яшайишдин дилаварчивалин ва мялуматарин технологйирин цирклиъ налог 1%-диина ис апIиди. Гъулан мяишатдин цирклиъ лихурайидариз вуйи налогра 6%-дилан 3%-диина ис апIиди. Жюрбежюр тешкилатарин хусусиятналан тувру налогра 1,5%-дилан 1%-дина ис шула.

Мидланра савайи, бицIи ва кьялан бизнесдин объектарихьан гьюкуматдин ва муниципалин хусусият арендайиз гъадабгънайивалихъан тувру гьякъи цIиб кьандисира тувуз шулу. Туризмдин ва промышленностдин гьясиллувалин цирклиъ игьтияжар гьуркIрайи тешкилатариз гьюкуматдин терефнаан кюмекнан жара уьлчмйир гьязур дапIна.

Гьацира, Республикайин Главайин Указдиз асас вуди, юкьур ва артухъ бицIидар айи хизанар транспортдин налогдикканра азад дапIна.

Гьюкуматдин улихь-кIулихь хьайидари чпизра, ухьузра лап читин вахтна, гьарсар кас гъагъи аьгьвалатнаан гизаф зарар дархьиди удучIвбан бадали, зегьмет зигура. Ухьура ухькан асиллу вуйиб тамам апIидихьа.