2019-пи йисан аьхириъ Китайин Ухань шагьриъ гизаф читин ва гъагъи уьзур арайиз гъафну. ЦIиб вахтналан му уьзур саки вари дюн`яйиз тарабгъну. Му уьзрихъди аьлакьалу аьгьвалат гъи ихь республикайиъра читинуб дубхьна. Уьзур агьалйирин арайиъ гьялакди тарабгъурайивал саб читин месэла вуш, гьаддихъди сабси ипIру-убхъру сурсатарин кьиматар за апIурайивалра читин месэла дубхьна.
Урусатдиз уьзур гъафиган, инсанар дишлади базрариан, магазнариан итIру сурсатар масу гъадагъуз чалишмиш гъахьну.Йигълан-йигъаз му сурсатарин кьиматарра за апIура. Мисал вуди гъадабгъиш, гьамусяаьт саб килограмм гулйирин кьимат 50 манат, саб лимондин кьимат 50-рилан 70 манатдиина за дубхьна. Гьаци имбуну итIру сурсатаринра.
Республикайин базрариъ ва магазнариъ айи ипIру-убхъру сурсатарин кьиматар за апIурайивалихъди аьлакьалу месэла фици гьял апIураш гьерхри, улихьнаси узу РД-йин гъулан мяишатдин ва ипIру-убхъру сурсатарин министрин заместитель Эмин Шайхгьясановдихьна илтIикIунза. Дугъан гафариинди, гъийин йигъазкьан республикайиъ ипIру-убхъру сурсатарихъди аьлакьалу аьгьвалат читинуб дар. Базрариъ айи сурсатарин аьгьвалатниин оперативный штабди ляхин апIура ва айи аьгьвалат гюзчиваликк уьбхюра.
«Гьамусяаьт республикайиъ ипIру-убхъру сурсатарин кьадар гьубкIну а. Учу гьар йигъан вари базрар ипIруб-убхъруб айивалин ва кьиматарин гьякьнаан ахтармиш апIурача. Саспи йишвариъ сасдар сурсатарин кьиматар за дапIна. Гьамусяаьт базрариъ, аьхю магазнариъ думукьан сурсатар масу гъадагъурайидарра адар. Фицики республикайиъ вари ресторанар, шадлугънан серенжемар гъахру йишвар вахтназ вуди хъяркьна.Гьаддиз базрариъ ипIру-убхъру сурсатарихъди аьлакьалу вуди думукьан гъалабулугъ`вал адар.
Малдарвалин сурсатарикан улхуруш, гьамусяаьт республикайиъ коронавирусдихъди аьлакьалуди арайиз дуфнайи аьгьвалатназ лигну, му сурсатарин кьиматар анжагъ 19-20-пи мартдиъ Мягьячгъалайиъна ХасавюртдиътIан за гъапIундар. Дидхъан кьиматар хъана чан улихьдин дережайиз ис гъахьну.
Мейвйирин гьякьнаан кIуруш, гулдин кьимат цIиб за дубхьна.Хъа лимондин ва имбирин кьиматар за хьпаканра дарпиди гъитуз шулдар. Мурар ухьухьна жара йишвариан хурайи сурсатар ву. Дурарин кьимат чан йишвариинтIан за гъахьну. Му месэлайин гьякьнаан РФ-дин гъулан мяишатдин Министерствойихъди сатIиди РД-йин Правительствойин председателин заместитель Аьбдулмуслим Аьбдулмуслимовра дахил шулайи оперативный дестейи ляхин апIура. Дурари Урусатдин вари регионариъ айи кьиматарин ахтармиш`валар гъахура»,
— гъапну министрин заместители.
Урусатдиз коронавирусдин уьзур гъафибси, саспи йишвариъ дишлади хюйин кьиматра хайлин за гъапIну. Мидин гьякьнаанра Эмин Аьбдулагьяжиевичди мялуматар тувнийи. Дугъу гъапиганси, кьялан гьисабариинди хю 5 – 10% за гъапIну. Хюйин кьимат за гъапIнушра, дугъу, уьлин кьимат за хьибдар, гъапнийи. Хъа эгер кьиматар дишлади 15% за гъапIиш, думу УФАС-ди гьял дапIну ккуни месэла ву.
«Республикайин агьалйири сад йигъандин арайиъ 1 агъзур тонна хю ва 700 тонна уьл ишлетмиш апIура. Гьелелиг хю гьубкIну ими. Гьар йигъан Ставрополь ва Краснодар краяриан республикайиз хю айи машинар гъюра. Эгер хюйин запасар гьадушвариъра ккудукIиш кIури, вахт ккимиди республикайи 10 агъзур тонна тахил масу гъадабгъна. Дидкан хю рябгъюз планламиш дапIна.
Гьамусяаьт республикайиъ айи аьгьвалатнахъди аьлакьалу вуди адабгъу 2-пи нумрайин Указдиинди, республикайин агьалйир итIру сурсатарихъди зат дидригъди тямин апIура. Учу МВД-йин гъуллугъчйирихъдира республикайиз сурсатар хурайи машинар деетбан гьякьнаан йикьрар дапIнача. Мидин гьякьнаан читинвалар адар. Яна республика яшайишдиз лап лазим вуйи вари сурсатарихъди тямин дапIна»,
— аьлава гъапIну Эмин Шайхгьясановди.
