Умгьанат Сулейманова
Табасаран райондин ТинитI гъул’ан вуйи, хусуси метлеб айи дявдин операцияйиъ иштирак шулайи Жабир Мягьямедовди газатдин машариантина чан дада Периханум Гусейбалаевна Дадайин йигъахъди тебрик апIуб ккун гъапIну. Редакцияйиз дуфнайи эскрин кагъзиъ гьамци дибикIна:
«Ассаламу алейкум! Ухьуз мялум вуйиганси, цӀиб улихьна, 30-пи ноябри Дадайин йигъ къайд гъапӀну. Редакцияйин ихтиярнаан, йиз дада – Мягьямадова Периханум Гусейбалаевнайиз машквар мубарак апӀуз ккундузуз. ТинтӀарин гъулаъ бабкан духьну, гьамушваъ аьхю ва эвленмиш гъахьи, хьур веледдиз уьмур туву кас, чан хизандиз ва гъулаз вафалу дишагьли ву йиз Дада. Кьюр риш ва шубур бай хаб’ин дюрхну, гъи шубрид баяр СВО-йиъ иштирак шулайиган, бабан кӀваан суза кам даршлубдин гъавриъ аза. Аммаки, аьзиз дада, Ватандин сяргьятарихъна къурхулувал дуфнайиган, жилижвувхьан гъирагъдилан лигури гъузуз шулинхъа? Думу учуз учву – ич гирами адашдина дадайи – туву тербия ву. Гъи яв веледар ярхла ашра, яв юкӀв – ич мухриъ, ич фагьмар-хиялар – ихь хулаъ, яв багахь ву, гирами Дада. Гьелбетда, «Дадайин йигъ» гизаф рягьимлу, мухур ширинвали абцӀру машквар ву. Марцци кӀваан яв машквар мубарак апӀурача, дада. Чухсагъул яв дугъривализ, яв гьякь жафайиз, учухъ зегьмет гъизигу йигъариз, учу ккарцури даъраху йишвариз! Учуз Уву айивализ чухсагъул! Яв веледарихьан увуз кьадар адру чухсагъул! ЦIибди сабур апӀин, дада: багарихьди гъалибвалин пайдагъ хьади гъидича. Яв баяр Жабир, Тажир, Сабир!
Кагъзин аьхиримжи гафар гьаму шиъриинди ккудукIуз ккундузуз.
Гирами Дада
Ккун апIурза, Дада, увкан:
Йиз кьастарин миван улхьан.
Аьламатнан кабхъназук наз
Чвйирихьна гъягъюз кюмекназ.
Уву тувуб вузуз абур,
Уву тувуб вузуз сабур.
Аммаки ялав айиз кIваъ,
Гъардшар ади дявдин женгнаъ.
Я жан Дада, аман-миннат,
АпIина кьабул йиз ният!
Гъидар учхьан нач ва аьйиб,
Хулаз гъюрча, духьну гъалиб…»
Дугъриданра, гъи ихь бабарин юкIвар гизаф назук духьна. Жабирин дада Периханумра, гъи шубур бализ ккилигури деъна. Дугъан жилир Эфлетдин Мягьямадов 12 йис улихьна кечмиш гъахьну. Гьелбетда, гъи дугъан ва хулан гъайгъу зигрудар чан баяр ву.
Периханум Гусейбалаевна 1952-пи йисан ТинитI гъулаъ аьхю хизандиъ бабкан гъахьну. Думу, ТинтIарин кьялан мектеб ккудубкIну, Дербент шагьриъ гъулан мяишатдин техникумдик урхуз кучIвру. Техникум ккудубкIбан кьяляхъ Периханум хайлин йисари ТинтIарин чяхрин заводдиъ микробиологди гъилихну. Хъасин «Рубас» совхоздин бухгалтерди лихуз хъюгъру. Мугъу, хьур велед дюн’яйиз духну, дурариз ужуб тербия тувну. Эсмира ва Эльмира чпин хизанарихъди яшамиш шула. Периханум Мягьямадовайиз му хьур веледдилан 11 худулра а. Шубрид баярра, Тажир, Жабир ва Сабир, хусуси метлеб айи дявдин операцияйиъ иштирак шула. БицIину бай Сабир 2012-пи йисхъанмина Крымдиъ эскервалин гъуллугъ гъабхури айир вуйи. 2014-пи йисан, Крым ихь гьюкуматдик кпикьу вахтна, дугъу контракт хъана давам гъапIну.
Аьхюну гъардаш Тажир, 2023-пи йисан хьадукра контракт йибтIну, Сабир айи йишваз гъуллугъ апIуз гъушну. Думугандиз Жабирин, учв военный гъуллугънаъ учIвур кIури, фикриъкьан ади гъабхьундар. Хъа аьхюну чвера гъушиган, юкIв кпибисри, Жабирира хусуси метлеб айи дявдин операцияйиъ иштирак хьуз ният гъапIну. Тажир ва Сабир Херсон терефнаъ а, хъа Жабир Белгороддин сяргьятарихъ хъа.
Улихьнаси, октябрин 24-пи йигъан ТинитI гъулан мектебдин 100 йисандин юбилейин серенжемдиъ жикъи вахтназ отпускдиз дуфнайи Жабир Мягьямадовра иштирак гъахьну. Дугъу мектебдин юбилейиз чпи женгарин вахтна душмандихьан тадагъу дявдин шей’ар, гьадму гьисабнаан йивну ипу дронра гъабхну ва дурар мектебдин музейиз пешкешди тувну.
