Зубайдат Шябанова
Табасаран райондин Хючна гъулан 1-пи нумрайин лицейин мялимар Марьям Гагаева ва Замира Аьзизова «Урусат мумкинваларин уьлке ву» президентдин платформайин «Образованиейин кIакIначйир» проектдин «Насигьятчивал» конкурсдин гъалибчйир гъахьну.
Му конкурс швнуб-саб ваз улихьна гьяракатнаъ ипнайиб вуйи. Гьаму йигъари дидин натижйир гъивну. «Насигьятчивал» конкурсдиз уьлкейин 55 региондиан 24 агъзуртIан артухъ аьрзйир дуфнайи. «Насигьятчивал» конкурс образованиейин цирклиъ насигьятчивалин культура артмиш ва тажрубайин ляхин мюгькам апIбан метлеб айиб вуйи. Конкурсдиъ кьюр мялим (насигьятчи ва насигьят гъадабгъурайир) сатIи духьну, иштирак шулайи. Дурари сар-сарин тажруба гъадабгъури, конкурсдиъ чпин улихь дивнайи табшуругъар сатIиди гьял дапIну ккундийи.
Конкурсдин гъалибчйириз тялукь сертификатар тувну, ва дурарихьан гьамусдихъантина региондин, федеральный ва варихалкьарин жюрбежюр дережйирин серенжемариъ экспертарси иштирак хьуз шулу.
Декабрин 3-6-пи йигъари финалистариз Пятигорск шагьрин аьгъюваларин «Машук» центриз теклиф гъапIнийи. Думу серенжемариъ финалистар уьлкейин машгьур спикерарин докладарихъ хъебехъну, насигьятчивалиъ жвуван жягьтлуваларин мяна ачухъ гъапIну, жара регионариан вуйи мялимарин тажрубайихъди таниш гъахьну.
Финализ удучIву ихь ватанагьлийир Хючна гъулан 1-пи лицейиъ тарихдин дарсар киврайи мялим Марьям Гагаевайи ва урус чIал ва литература киврайи мялим Замира Аьзизовайи ич сюгьбатнаъ думу конкурсдикан ктибтнийи.
«Саб-кьюб ваз улихьна ич лицейин мялим Замира Аьзизова федеральный мяна айи конкурсдиз гьязур хьуз хъюгънийи. Учуз варидариз дидкан хабар айчуз. Думу конкурсдин сайтдиъ иштиракчийи чаз гъядягъюз насигьтчйирин уьмуми сиягьра улупнайи. Сиягьдиъ уьлкейин образованиейин цирклиан вуйи конкурсарин гъалибчйир, аьлимар ва хайлин йисарин тажруба айи мялимар айи. Замирайи чан насигьятчи хьуз узуз теклиф дивган, мюгьталра гъахьнийзу. Узу Замира йиз тажрубайихъди, хъа дугъу узу гьаму деврин техникайихъди таниш апIури, конкурсдин вари этапариъ иштирак гъахьунча. Замира бажаранлу мялим ву. Дугъаз гьаму деврин чат-ботар, текстар, проектар тартиб апIуз ва дурар хъуркьувалиинди арайиз хуз аьгъя. Узу разивалиинди дугъан теклиф кьабул гъапIунза, ва магьа натижара ужуб гъабхьну», – гъапнийи Марьям Гагаевайи.
Табасаран райондин мялимарин машгьур тухмарин вакил Замира Аьзизовайи Хючнаарин 1-пи нумрайин лицейиъ урус чIал ва литература киври 19-пи йис ву. Президентдин платформайин «Насигьятчивал» конкурсдилан гъайри, думу улихьна йисари «ВаритIан ужур классдин руководитель» конкурсдиъ Дагъустандиъ гъалиб гъахьну ва федеральный дережайиз удучIвну.
«Гьаму конкурсдиъ иштирак хьуз узуз 2023-пи йисан «Образованиейин кIакIначйир» конкурсдин гъалибчи, Дербент шагьрин 12-пи нумрайин мектебдиъ инглиш чIал киврайи мялим, РД-йин образованиейин ва илимдин министрин насигьятчи Аида Кьасумовайи теклиф дивну. Узухъди думу конкурсдиъ иштирак хьуз узу региондин ва федеральный конкурсарин гъалибчи, йиз ляхнин юлдаш Марьям Гагаевайиз дих гъапIунза. Узуз дугъахъди лихуз лап кьабулди вузуз. Дугъаз конкурсдиъ иштирак шулайир гьевеслу апIуз, рякъюъ тIауз аьгъя. Думу гьякьикьи насигьятчи ву.
Ич проект яшар бегьем духьну адру бицIидарихъди ляхин гъабхбаз бахш дапIнайиб вуйи. СатIиди конкурсдин гьарсаб этапдин табшуругъар тамам апIури, собеседованиейин аьхиримжи пайнахъна гъафунча. Собеседованиейин этапдиз, учуси, кью-кьюр мялим айи 200 десте удучIвну. Жюрийин экспертар уьлкейин машгьур аьлимар вуйи. Дурари 45 дакьикьайи туву суаларин жавабариз диву ва улихьна конкурсарин табшуругъарин баллар сатIиди иливган, финализ удучIвнийча», – аьлава гъапIну ич сюгьбатнаъ Замира Аьзизовайи.
Табасаран райондин глава Мягьямед Къурбановди кьюрид мялимарра заан гъалибвалихъди тебрик гъапIну. Дугъу Марьям Гагаевайин ва Замира Аьзизовайин федеральный проектариъ лайикьлуди иштирак шули ва заан натижйир гъадагъури сабпи раж даруваликан ва чпин пишейиз вафалу мялимари райондин образованиейин дережа улихь гъябгъюз гъитрайиваликан гъапну.
