НАРГИЗ ГЮЛЕЧОВА
7-пи декабри «Анжи АРЕНА» стадиондиин «Динамо» Мягьячгъала ва «Пари НН» Нижний Новгород командйирин арайиъ Урусатдин премьер-лигайин (РПЛ) футболин 18-пи турин талит гъабхьну. Матч ккебгъну 19-пи дакьикьа гъябгъюрайи вахтна «Динамо» командайин вакил Жемал Табидзейиз судья Алексей Сухойди «уьру» карточка улупну, думу футболин майдандилан алдаънийи. Дагъустандин команда цIиб кьадарнаъди гъузнийи, ва дурариз хялари сабпи гол ипнийи.
Пуб лазим вуки, аьхиримжи вахтари РПЛ-ин матчариъ кIулин судйирин Дагъустандихьна вуйи янашмиш’вал ужуб даруб варидариз рябкъюра. Фу чара дапIнура, дурари ихь командайиз улихь гъябгъюз манигъвал апIура. Мидин гьякьнаан гьятта федеральный каналарианра кIура. Фукьан зегьмет гъизигишра, Мягьячгъалайин «Динамойихьан» турнирин таблицайин 13-пи йишвлан зиина удубчIвуз гъабхьундар.
РПЛ-ин 18-пи турин аьхиримжи матч гъабгъюрайи йигъан Дагъустандин командайин аьгьвалат читинуб вуйиб стадиондиина дуфнайи гьевескраризра рябкъюрайи. Гьадму йигъанси, дидиз улихьна вуйи турариъра «Динамо» лап кьяляхъ хъайи командайирихьанра кмиди магълуб хьувализ лигну, футболиз лигуз дуфнайи гьевескрари чпиин али курткйирин йирфарик «Биджиев, удучIвну гъарах» дибикIну, командайин кIулин тренериз кьял йивну дийигънийи. Гьаму себеб вуди, ва команда нубатнан ражари магълуб хьувализ лигну, матчдин кьяляхъ гъабхьи пресс-конференцияйиъ Мягьячгъалайин футболин клубдин кIулин тренер Хасанби Биджиевди сарун ляхниан удучIвуз аьрза гъибикIунза кIури, мялум гъапIну.
18-пи турин аьхиримжи талит хьпан кьяляхъ, Урусатдин футболиъ тятIилар ккергъну, вари командйир рягьятвализ гъушну.
Республикайин главайи Мягьячгъалайин «Динамо» клубдин артмиш’валин гьякьнаан вуйи заседаниейиъ «Анжи АРЕНА» стадиондиин гьевескрари тренерихьна улупу гьюрматсузвализ чан наразивал ва командайин кIулин тренер ляхниан удучIвуз аьрза бикIувалин гьякьнаан чан фикрар ачухъ гъапIну. Заседаниейиъ Сергей Меликовди сабпи нубатнаъди Хасанби Биджиевдиз «Динамо» клуб РПЛ-лиз адапIбан бадали гъизигу зегьметназ чухсагъул мялум гъапIнийи.
Заседаниейиъ «Динамо» Мягьячгъала клубдин идара апIбан гъурулушра дигиш дапIну ккуниваликан, клубдин директорарин совет тешкил апIбакан гъапнийи. Янаки, клуб артмиш апIбан бадали, советдин ва клубдин тешкилатчйирин дахилназ гъирагъдиан дакьатар жалб апIуз шлу, ужуб бин ккайи жавабдар касар гъадагъиди. Гьадрарикан сар сенатор Сулейман Керимов ву.
Къайд дапIну ккундуки, 9-пи январихъанмина 20-пи феврализкьан, РПЛ-ин 2025-2026-пи йисарин сезондин кьюбпи пайнахьна гьязур шули, «Динамо» Мягьячгъала командайин тренировкйир Турцияйин Белек шагьриъ кIули гъягъиди. Гьадму вахтнан арайиъ душваъ, командайин гьязурлугвал фициб вуш ахтармиш апIру 9 матчра хьибди. Хъа командайиз кIулин тренер адрувалин гьякьнаанра кIуруш, гьамусяаьт клубдин улихь-кIулихь хьайидари ужубсиб кандидатура абгура. Мидин гьякьнаан клубдин генеральный директор Шамиль Аьзизовди хабар тувну.
«Гьялак магьанай, ярхи апIидарча. Эгер фукIа якьинди арайиъ гъабхьиш, учу дишлади мялумат тувдича», – гъапну Шамиль Аьзизовди.
