НАРГИЗ ГЮЛЕЧОВА
Улихьна йигъари Мягьячгъалайиъ шадлугънан мяракйир гъахру «Аль-Амир» залиъ инвалидарин йигъаз бахш вуди «Асас шадвал» ччвур тувнайи серенжем кIули гъубшну. Думу аутизм, онкология, Даундин синдром, ДЦП, буллёзный эпидермолиз ва хъанара жара уьзрариан иццурайи бицIидарин ва дурарин дадйирин гевюл цIиб ачухъ апIуб ният ади, «ТК Титан Групп» ООО-йин ва «Дианайихъди сабси уж’вал апIин» рягьимлувалин тешкилатдин кIулиъ айидарин жягьтлувалиинди ихь ватанагьли Диана Уьсмановайи тешкил гъапIуб ву.
Дианайи гьар йисан му жюрейин швнуб-серенжем кIули гъахура. Сач дугъу 500 касдиз, хъа цци 600 кас инвалид бицIидариз ва дурарин дадйириз серенжемдиз дих гъапIну.
Му дирбаш табасаран шуру апIурайи ляхниз чпин гьюрмат улупури, серенжемдиз хайлин хялар дуфнайи. Гьадрарин арайиъди Дагъустан Республикайин бицIидарин месэлйир гьял апIбаан вари ихтиярар тувнайи Марина Ежова, РД-йин образованиейин, сагъламвал уьбхбан, милли политикайин ва диндин ляхнариз лигру министерствйирин, республикайин Жямяаьтлугъ палатайин, «ЦIийи инсанар» партияйин, «Инсан», «Марцци юкIв», «Благосфера» ва «Нивгъар адру уьмур» рягьимлувалин фондарин вакилар иштирак гъахьнийи. Диана Уьсмановайихъди сабси серенжем гьязур апIуз аьхью кюмек туву сарсана ихь ватанагьли, Урусатдин «Уьру хач» тешкилатдин Дагъустандиъ айи отделениейин кIулиъ айи Раиса Шагьсиновара дуфнайи.
«Му ляхин апIури 10 йистIан артухъ вуйиз. Гьяйифки, ич серенжемариз уч шулайи иццру бицIидарин кьадарра йислан-йисаз артухъ шула.
Йисандин арайиъ гъахурайи му жюрейин серенжемар, гьелбетда, сар узхьан кIулиз адагъуз шлудар дар. Гьарсаб мяракайиз узуз аьхю кюмек апIурайи касар айиз. Дицдар касарин кьадар цIиб дар. Гьаму ражари удучIвурайи вари харжар чаина «ТК Титан Групп» ООО-йи гъадагъну. Аьхю чухсагъул чпиз. Мицдар яркьу мяракйир кIули гъахуз узухъди сабси кюмек апIурайи волонтерар адайиш, узхьан гьич гьацI пайкьан тамам апIуз хьибдайи. Дурариз варидариз чухсагъул кIураза», – гъапну Диана Уьсмановайи.
Серенжемдин аьхириъ инвалид бицIидариз мукьан фикир туври, дурар ва дурарин дадйир рази ктауз аьхю зегьмет зигурайивализ лигну, республикайин образованиейинна илимдин министерствойи ва Жямяаьтлугъ палатайи «Асас шадвал» серенжемдин тешкилатчи Диана Уьсманова чухсагъулин кагъзариинди лишанлу гъапIну.
