Зубайдат Шябанова
Гьаму йигъари Табасаран райондиъ вари Урусатдин «ВаритIан ужур мялим — 2026» конкурсдин муниципальный натижйир гъивну. Думу конкурсдиъ иштирак хьуз райондин мектебариъ лихурайи 16 мялимди аьрзйир тувнийи. Конкурсдин жюрийи варитIан заан кьиматар ТинитI гъулан мектебдин мялим Паша Къулиевдиз (шиклиъ) дивнийи. Паша Къулиев гьамусяаьт конкурсдин зональный этапдихьна гьязур шула.
Ич сюгьбатнаъ ТинитI гъулан мектебдин директор Аьбдулфятягь Фятягьовди къайд гъапIганси, Паша Къулиев мектебдиъ лихури 20 йистIан артухъ ву.
«БицIидар Паша Зейфуллаевичдин дарсназ аьшкьниинди гъюру. Дугъу дарс деврин тIалабариз жаваб тувру къайдайиинди ва маракьлувалиинди кивру. Дугъу мялимарин коллективдиъ ва урхурайидарин арайиъ аьхю гьюрмат гъазанмиш дапIна. Мектебдиъ урхурайи гьарсар бицIирихьна думу жвуван веледдихьнаси, тIалаблувалиинди, ужудар аьгъювалар ва тербия туври янашмиш шула.
Паша Зейфуллаевичдиз конкурсдиъ хъуркьувалар ккун апIураза. Думу, дугъриданна, гъалибвализ лайикьлу мялим ву», – гъапнийи Аьбдулфятягь Фятягьовди.
Паша Къулиев 1980-пи йисан Табасаран райондин ТинитI гъулаъ бабкан гъахьну. Гъулаъ мектеб кудубкIбан кьяляхъ, Дербент шагьриъ «Юждаг» институтдик урхуз кучIвну. 2004-пи йисан диплом гъадабгъну, багъри гъулан мектебдиз гъафну. Думу биологияйин ва химияйин мялимди лихура.
Пашайин аьхю аба Къазиаьгьмад Къулиев дявдин йисари ТинитI гъулан мектебдин директорди, хъасин хайлин йисари математикайин дарсар кивру мялимди лихури гъахьну. Пашайиз мектебдиъ урхури имидитIан, чан аьхю абаси, мялим хьуз ккундийи. Ав, мялимвалин пише ктабгъбаъ абайин роль аьхюб гъабхьну.
«Узуз шубурсана чве азуз. Дурар вари военный гъуллугъчйир ву. Аьхюну чве Къази кечмиш гъахьну. Мустафа Ленинградский областдиъ уьлкейин сяргьятар уьрхру кьушмариъ лихура. БицIину гъардаш Саид гьамусяаьт хусуси метлеб айи дявдин операцияйиъ иштирак шула. Узу йиз гъардшариинди дамагъ апIураза. Эгер узу байвахтна абайин рякъюъди гъягъюз гаф тувундайиш, узура, якьин, военный гъуллугъчи хьидийза. Абайилан ва йиз адашдилан гъайри, узуз ич мектебдин хайлин тажрубалу мялимар уьмрин насигьятчйир гъахьунзуз», – ктибтура Паша Къулиевди.
ИкибаштIан, биологияйин ва химияйин дарсар мектебдин лабораторйириъ, микроскопар ва жара алатар ади киврудар ву. Му цирклиан тяминвалихъди ТинитI гъулан мектебси, кIулди Дагъустандин вари мектебар гьеле зяифди ву.
«Деврин мялуматарин дакьатари образованиейин цирклиз аьхю мумкинвалар арццну. Улихьди мялимари ляхниз лазим вуйи мялуматар чпин пишекарвалиан вуйи тялукь журналариан гъадагъуйи. Гьамус мялим, саб читинвалра адарди, тестарин, видеоконтентдин, жюрбежюр методикйирин онлайн-ресурсарихьна илтIикIура. Мидланра гъайри, деврин технологйирикан бязи бицIидариз мялимаризтIан ужуди аьгъя. Бязиган дурар му цирклиан мялимариз мясляаьтчйир шула. Гьаму аьлакьйири, яна мялимдин ва урхурайидарин сар-сарихьна вуйи гьюрматнан рафтари образованиейин цирклиъ саб фукIа цIийиб арайиз хуз ва артмиш апIуз кюмек тувру. Магьа ич мектебдиъ «Точка роста» образованиейин центр абццна. Дидин гьаму деврин алатарин кюмекниинди баяр-шубарихъди ахтармишарин ляхин гъабхбан цирклиан дарсар киври шулза. Гьяйиф, жюрбежюр опытар гъахуз мумкинвал адарчуз. Химия гьадмукьан гужли предмет ву. Дидихъ ихь гележег хъа. Фармацевтика, медицина, нефтехимия, экология, биотехнология, клонирование – вари гьаму улихь гъягъюрайи цирклари химияйинна биологияйин аьгъювалар ва артмиш’валар ккун апIура. Гъи химикари, биологари илимдин лабораторйириъ деъну амиди, табиаьтдиъ зат адру клеткйир вая тикилишдин материалар арайиз хура. Йиз выпускникарра медицинайин, экологияйин, нафт тартиб апIру ва гъулан мяишатдин циркларин пишйир гъадагъуз гъягъюра. Гележегдиъ дурари чпин пишйириъ хъуркьувалар гъадагъну ккундузуз. Гьаддиз узу гъи туву аьгъюваларилан дурарин гележег асиллу шула», – аьлава гъапIнийи мялимди.
Паша Зейфуллаевич гьякь ву. БицIирин гележегдин уьмриъ мялимари важиблу роль гъабхура.
Паша Къулиев кIулиъ ади вари мялимар улубкьурайи цIийи йисахъди тебрик апIури, варидариз гележегдиъ хъуркьувалар, мюгькам сагъвал ва хизандин хушбахтвал ккун апIурача!
