Мейлан Нежефов

Улихьна йигъари Хив райондин администрацияйиъ Урусатди Украинайиъ гъабхурайи хусуси метлеб айи дявдин операцияйиъ Ватандин улихь чпин буржи вафалувалиинди тамам апIури талаф гъахьи, Хиварин гъулан агьалйир вуйи сержант Багатыр Къурбалиевдиз ва рядовой Роберт Гюлечовдиз йикIбан кьяляхъ Кьягьялвалин орденар тувбан серенжем кIули гъубшну.

 

Серенжемдиъ администрацияйин вакилар ва игитарин багахьлуйир иштирак гъахьнийи.

Серенжем, махлукьатлу дявди уьмриан гъуху игит баяр фикриъ уьрхюри, иштиракчйир саб дакьикьайин арайиъ ккебехъну ликри гъудужвбалан ккебгънийи. Орденар багахьлуйирихьна рукьури, райондиз регьбервал туврайи Ярмет Ярметовди гьамци гъапнийи: «Дустар, Багатыр ва Роберт ихь арайиан рягьматдиз гъушнушра, ихь кIваъ гьаргандиз игитарди гъузди. Дурари ихь саламат уьмур бадали, чпиз варитIан багьалу ва ширин вуйи чпин уьмур гюллин улихь гьипувал ухьу саб вахтнара кIваълан гьархну ккундар. Гьацдар игит баяр Ватандиз бахш гъапIу учвуз аферин. Ухьухь, зиян вахтну сагъ апIуру, кIури шулу. Гьелбетда, велед, багъри кас вахтсузди уьмриан гъягъбан зиян гьич саб вахтнахьанра сагъ апIуз хьибдар. Ичв кIваз Аллагьди cабур туври. Узу учвкан гьацдар игит баяр гъахьунчухъ пну, кIул за дапIну, гъи дурар игитарин цIарнаъ айич кIури, лицуб ва дурарин рюгьяр рази ктауб ккун апIураза. Хъа аргъаж шулайи наслариз дурар аьсрариинди нумунади гъузрувалиин узу умудлу вуза».