Гюльнара Мягьямедова
Дагъустандин глава Сергей Меликов республикайин муфтий шейх Аьгьмад Афанди Аьбдуллаевдихъди ва диндин гъуллугъчи Аьбдулла Ацаевдихъди гюрюшмиш гъахьну. Гюрюшмиш хьувалин асас метлеб – региондиъ дин хъапIрударин арайиъ ислягьвал ва халкьарин сабвал уьбхбан бадали, аьлакьйир яркьу апIуб вуйи.
Сергей Меликовди къайд гъапIганси, гьаму гъябгъюрайи йис уьлкейин Президентди Урусатдин халкьарин сабвалин йис вуди мялум дапIна, хъа гизаф миллетар яшамиш шулайи Дагъустандиз думу хъана артухъ мяналу ву. Дагъустанди читин вахтари чан халкьарин сабвал уьбхюваликан, мисалназ гъадабгъиш, 1999-пи йисан дагъустанлуйири улупу дирбаш’валикан Владимир Путинди швнубна саб ражари дупна, дугъу дагъустанлуйирин аьдатариз заан кьимат тувра.
«Узу гьаммишан кIури шулза, Дагъустандиъ миллетарин ва динарин арайиъ гъалмагъал адар. Вушра агьалйирин арайиъ гьял апIру бязи месэлйир шулу», – гъапну республикайин главайи, гьадму месэлйир дериндиан гьял апIуз учв гьязур вуйиваликан кIури. Ихь асас метлеб ислягьвал ва гафнан сабвал уьбхюб, гъалмагъалар хьуз гъидритуб вуйихь.
Сергей Меликовди вари жюрейин дин хъапIрударихьна айи чан гьюрматнакан улхури, диндихьна вуйи жвуван фикрарра ачухъ гъапIну. «Дин инсандин кIваъ ади ккунду. Ухьу ихь ярхи уьмриъ дин аьгъю апIурашра, гьар ражари фу-вуш цIийиб аьгъю шулахьуз. Гафнан саб дарувалар инсанариз зарар тувру, ихь жямяаьтлугъдин аваза чIур апIру гъалмагъалариз илтIикIну ккундар», – гъапну дугъу.
Дагъустандин муфтий шейх Аьгьмад Афанди Аьбдуллаевди аьлава гъапIнийи: «БицIи-бицIи наразивалар багахьлу инсанарин арайиъра хьуз мумкин ву, хъа дурар гьял апIуз шлудар ву. Гьаму ихь серенжемдиъра, вари наразивалар гъитну, ухьуз цIийи 2026-пи йис албагну ккебгъуз ккунди айиб субут апIура.
Шейхди, региондиъ конфессйирин арайиъ ислягьвал уьбхбаз кюмек апIурайивализ дилигну, Сергей Меликовдиз чухсагъул мялум гъапIнийи. Диндин гъуллугъчи Аьбдулла Ацаевди динагьлийирин арайиъ айи аьлакьйир айибтIан ужи апIбан гьякьнаан чан теклифар дивнийи.
«Сяид Афандийи чан вари уьмур ислягьвалин ва сабвалин теклифар диври гъахьну. Ухьу гьадгъу ккиву рякъ давам апIурахьа ва уьлке мублагъ апIуз мумкинвалар агурахьа», – гъапнийи дугъу.
Сергей Меликовди дагъустанлуйир сатIи апIбак шейх Сяид Афандийи киву пайнаканра гъапнийи. «Шейх Сяид Афандийихьна аьхю гьюрмат айиз. Дугъу киву дарсари ужуб натижа гъабхну», – аьлава гъапIну региондин кIулиъ айири.
Дагъустандин главайи къайд гъапIганси, гьамусяаьт республикайиъ мусурман улматдин сабвализ хатIа адар, амма арайиъ цIа ипуз ккунидариз аьксивал улупури, сатIивал мюгькам апIбан ляхин дубхну ккунду. «Ухьу саб республикайиъ яшамиш шулайидар вухьа ва сабсдар месэлйир гьял апIурахьа. Гьюкум, диндин регьбрар ва жямяаьтлугъ мусурмнарин арайиъ гафнан сабвал хьувалихъанди ву. Йисандин арайиъ ухьу айи месэлйир ислягьвалиинди варидари сатIиди гьял апIидихьа», – гъапнийи Сергей Меликовди.
Гюрюшмиш хьувалин аьхириъ иштиракчйири рабочий дестейин дахилнаъди гьял дапIну ккуни теклифарикан гъапнийи.
