Дагъустан Республикайин Государственный секретарди ихь ватанагьли Нюсрет Уьмаров дерккну. Дидин гьякьнаан вуйи указдиин региондин глава Сергей Меликовди къул гъизигну.

Дагъустан Республикайин къанундиз асас вуди, 2023-пи йисан 27-пи июндихъан башламиш дапIну, Дагъустандин государственный секретари республикайин главайиз экономикайин ва яшайишдин цирклариъ гьюкуматдин политика гъабхуз кюмек апIуру, республикайин главайиз Дагъустандин муниципальный образованйириъ жямяаьтлугъдинна политикайин ва яшайишдинна экономикайин аьгьвалатнакан мялуматар тувру. Дугъу гьацира гьюкмин ляхин кIулиз адабгъру ва ерли самоуправлениейин органариз къанундин актар ва республикайин кIулиъ айирин табшуругъар тамам апIбан ляхниъ, миллетарин арайиъ айи месэлйир гьял апIбаъ кюмек тувру.
Нюсрет Уьмаров 1971-пи йисан Хив райондин ГъуштIил гъулаъ бабкан гъахьну. 1993-пи йисан дугъу Дагъустандин гъулан мяишатдин институтдиъ экономист-тешкилатчийин пише гъадабгъну.

Зегьметнан рякъ ккебгъхъанмина Нюсрет Уьмаров жюрбежюр гъуллугъариъ гъахьну: республикайин главайин ва правительствойин администрацияйин кIулиъ айирин заместитель, Дагъустандин правительствойин председателин сарпи заместитель, Дагъустан Республикайин главайин Халкьдин Собраниейиъ гьуркIу ихтиярар айи вакил.

 

Гьюрматлу Нюсрет Мягьямадович!
Яв цIийи гъуллугъ мубарак апIурача. Думу, увузси, ихь вари халкьдизра хъуркьувалин гьядиса ву. Гъит, цIийи гъуллугънаъ яв гьарсаб алдабгъу лик ягъурлуб ибшри, кIваъ айи ужудар метлебар кIулиз удучIври, уву кьабул апIру къарарар баркаллудар, республикайин агьалйириз хайирлудар ишри.
Газатдин редакцияйин коллектив.