Гюльнра Мягьямедова
17-пи феврали Мягьячгъалайиъ Мялуматарин ва чап апIбарин агентствойин 2025-пи йисан гъапIу ляхнин натижйир йивру коллегия кIули гъубшну.
Коллегия ачмиш апIури, РД-йин Главайин ва Правительствойин администрацияйин кIулиъ айирин заместитель, Мялуматарин политикайин ва мялуматарин гъуллугънан управлениейин начальник Рашид Акавовди агентствойи дапIнайи ляхникан гьамци гъапну: «Гъийин читин девриз дилигди, РД-йин мялуматарин ва чап апIбарин агентствойи чан улихь дивнайи месэлйир хъуркьувалиинди тамам апIура. Агентствойи, нарази вуйидар гизаф ашра, СМИ-йин реформа гъубхну, гьамус мялуматарин дакьатариъ лихурайидарин маважиб за апIбиин ляхин гъабхура.
ЦIийи проектар уьмриз кечирмиш апIувал, гьадму гьисабнаан «Zащитник» журнал чапдиан адапIуз хъюгъювал тебрик апIураза. Мидихъди сабси электрондин дакьатар ишлетмиш апIури чап апIбан сурсат артухъ апIбан зегьмет дизигну ккунду».
Коллегияйиъ, 2025-пи йисан Дагъустандин мялуматарин дакьатар фици дигиш гъахьнуш, гьаддикан доклад хьади РД-йин мялуматарин ва чап апIбарин Агентствойин кIулиъ айи Арсен Юсупов удучIвну гъулхнийи. Дугъу чан улхбаъ къайд гъапIганси, 2025-пи йисан Агентствойи гьюкуматдин мялуматарин дакьатарин реформа гъубхну. Урус чIалниинди удучIвурайи «Дагъустандин правда», «Дагъустандин жигьилар», «Люкь» газатар, «Дагъустан» ва «Zащитник» журналар сатIи дапIну, РД-йин ГАУ «Дагъмедиа» цIийи идара тешкил гъапIну.
Республикайин мялуматарин асас дакьат «Дагъустан» РИА «ЦIийи медиайин институт» АНО-йихъди (Автономный коммерцияйин дару тешкилат) сатIи дубхьну, имбубсан гужал гъабхьну. 2025-пи йисан АНО-йин тешкиллувалиинди СВО-йин игитар Айдемир Исмаиловдикан ва Мягьямад Мягьямадовдикан анимацияйин фильмйир адагъну.
Республикайин телеканал «Дагъустан» РГВК-йиъ цIийи телестудия ачмиш гъапIну. Душваъ гьацира агьалйириз кьабул духьнайи «Эскрин юкIв» (хусуси метлеб айи операцияйин иштиракчйириз алахьу дюшюшарикан ктибтурайи передача) ва хусуси метлеб айи дявдин операцияйиъ гъийиху эскрарин веледари чпин адашарикан ктибтурайи «Игитарин бицIидар» проектар лихуз хъюгъну.
Чап апIбарин циркил цIийиди тешкил дапIнайи «Дагъгосиздат» идарайин хиликкди либхуз хъюбгъна. Думу идарайи китабар чап апIуб, газатар-журналар подписка апIуб ва подписка дапIнайи дакьатар агьалйирихьна гъахуб чаина гъадабгъну.
Кьюб пайнакан ибарат вуйи реформайи ва гъурулушдиъ цIийивалар тIаъбу гьюкуматдин идарйирин кьадар цIиб гъапIну: сабпи пайнаъ — 27-дилан 15-диина, кьюбпи пайнаъ — 15-дилан 5 холдингдиина.
Натижайиъ Дагъустандин мялуматарин дакьатар ерийин ва мянайин цIийи дережайихъна гъафну.
Дагъустандин СМИ гьацира бабан чIалар уьрхбан гьюкуматдин программа уьмриз кечирмиш апIбан асас иштиракчйир хьиди.
РД-йин глава Сергей Мели-ковдин тешкиллувалиинди «Дагъустан Республикайин гьюкуматдин чIалар уьрхюб, аьгъю апIуб ва артмиш апIуб» кIуру гьюкуматдин программа тартиб ва кьабул дапIна. Документди региондин чIаларин артмиш’вал уьбхбаъ гьюкмин, илимдин, образованиейин ва ватандашарин кьувват сатIи апIура.
«Дагъустандин мялуматарин дакьатарин улихь цирклин мянфяаьтлувал за апIбан месэла дийибгъна. Узу журналистарин маважиб за апIуб тIалаб апIидиза ва гьаддиинди гюзчивал гъабхидиза. Маважиб за апIуз мумкинвалар а», — гъапну РД-йин мялуматарин ва чап апIбарин Агентствойин кIулиъ айи Арсен Юсуповди.
Коллегияйин аьхиримжи пайнаъ 2025-пи йисан лишанлу гъахьи СМИ-йин журналистариз гьюрматнан грамотйир тувну.
