Урусатдин Президентдин указдиз асас вуди хьадукран призыв 2020-пи йисан 1-пи апрелиан 15-пи июлиз гъябгъиди. Дюн’яйиъ коронавирусдин уьзур тарабгъбахъди аьлакьалу вуди ццийин йисан жигьилар Урусатдин Яракьлу кьувватарин гъуллугъназ гъадагъбан вахт гьюдюхну. Табасаран райондиъ призыв 2020-пи йисан 13-пи апрелиъ ккебгъну.
Улихьна йигъари Табасаран райондин военный комиссар Садикь Мурадялиевдихъди сюгьбат гъубхнийза.
Садикь Аьбиловичдин гафариинди, 2020-пи йисан хьадукран призывдиъ Табасаран райондиан Урусатдин Яракьлу кьувватариз ватандин улихь чпин буржи тамам апIру йишвариз жигьилар 20-пи майдихъантIан гъахидар. Армияйиз гъуллугъназ гъахрударихъди аьлакьалу призывдин серенжемарикан му сабпи пай ву. Гьамусяаьт варитIан важиблу месэла, коронавирус тарарабгъбан бадали, думу призывникарик ва военкоматариъ айи гъуллугъчйирик ктрубчIвбан бадали, лазим вуйи уьлчмйир кьабул апIувал ву. Гьадму ляхнар кIулиз адагъбан метлеб ади, призывдин пунктар инсандик ктруркIри температура аьгъю апIру термометрйирихъди, бактерйир терг апIру кварцдин лампйирихъди, тест гъурулушарихъди, медицинайин маскйирихъди, гьава ва кабинетар микробарихьан зегьерсуз апIру шей’арихъди тямин дапIна.
«Призывдин комиссйирин ляхин, ватандашар военный комиссариатдиз гъюру йигъар тасдикь дапIну, гьаддиз асас вуди албагна. Армияйихьан азад апIру ва армияйиз гъягъру вахт (урхувалихъди ва жара ляхнарихъди аьлакьалу вуди) давам апIуз ният айидар армияйиз гъягърударихьан жаради кьабул апIиди. Армияйиз дурушру касар затра кьабул апIидар. Гьацира военкоматари, саб йишв’инди гизаф инсанар кьабул дарапIуз кIури, инсанар кьабул апIру ляхнин график гьюдюхна.
Хьадукран призывдиъ Табасаран райондиан Урусатдин армияйин жерг-йириз 80 бажаранлу баяр гъягъиди. Дурар 12 вазлин арайиъ гъуллугъ апIуз жюрбежюр йишваризди пай апIиди – Урусатдин кьибла терефнан округдиз, кьялан яракьлу кьувватарин округдиз, ригъ алабхъру терефнан ва ригъ гьудубчIвру терефнан округариз, гьацира кафари флотдиз. Жигьилари оборонайин Министерствойин ва Росгвардияйин частариъ гъуллугъ апIиди.
Жигьилар призывдин пунктдиз, дурар гъахру машинар дезинфекция дапIну, хъасин гъахиди. Дурариз лазим вуйи шей’ар вари тувди, ипIруб, ккуртар, кIул’инди электрондин картйир, ва гь. ж. шей’ар», – къайд гъапIнийи Садикь Мурадялиевди.
Дугъу мялум гъапIганси, жюрбежюр себебар агури, армияйиъ гъуллугъ апIбаккан кIул ккадабгъуз ккунидарра шулу. Дицисдар касар агбаъ РОВД-йин гъуллугъчйири кюмек апIура. Федералин къанундиз асас вуди, призывдин яшнаъ айи вари агьалйир медицинайин комиссияйин ахтармишариз гъюз буржлу ву.
