Наргиз Гюлечова
Дагъустан Республикайиъ марччари асас вуди ччилар апIру вахт мартдин вазли ву. Гьамусяаьт малдарари региондин 5 зонайин галариъ кьюрд адапIурайи чарвйири ччилар апIру кампания ккебгъна.
ЦIиб улихьнаси гъулан мяишатдин ва ипIру-убхъру сурсатарин министрин сарпи заместитель Шарип Шариповдихъди узу кIули гъубху интервьюйиъ дугъу къайд гъапIганси, ццийин йис аьхъюб вушра, галариз хъаънайи мал-къарайи кьюрдун вазар читинвал кадарди адаура.
«Галар айи зонйириъ гьубкIну алаф ва гьяйванатариз вуйи жара жюрейин ипIруб гьязурди а. Республикайин кафари терефназди вуйи зонйирин галариз 1,3 миллион чарвйир хъаъна. Гъийин йигъаз саки 80 агъзуркьан ччиларра дапIна. Ихь республикайиъ асас вуди ччилар апIру вахт февралин аьхирар ва мартдин эвелар ву. Пландиинди цци республикайиъ марччари саки 3 миллиондихьнакьан ччилар апIуб гюзлемиш апIура», – гъапнийи Шарип Шариповди.
Гьаму йисан республикайиъ 1082797 чарвайи ччилар дапIну ккунду. 5-пи мартдиз вуйи улупбариинди, марччари 176054 ччил дапIна. Гьарарикан гъуздар 172746 (98%) ччил ву.
Хулариъ гъузнайи чарвйирси дарди, галар айи зонйирикан чарвйири ччилар апIбан ужудар хъуркьувалар улупурайиб Кочубейдин зона ву. Му зонайиъ ерлешмиш духьнайи варитIан ужудар натижйир Рутул ва Акьуша районарин мяишатари улупура. Шарип Шариповди туву мялуматариинди, Рутул райондиан галарин мяишатариз хъаънайи 21455 чарвайи 7905 ччил гъапIну. Гьадрарикан гъуздар 7705 ччил ву. Хъа Акьуша райондин галариз 95709 чарва хъаъна. Гьадму чарвйирикан саб пайну 13810 ччил гъапIну, дурарикан гъуздар 13554 ву. Янаки, процентариинди гьисаб гъапIиш, гъузу ччиларин кьадар саки 98% шула.
Мицисдар ужудар натижйир улупбан асас себеб, гьубкIну ипIруб айивална гьавйир ужудар вуйивал ва, гьаддихъди сабси, йишв-йигъ дарпиди марччлихънари зигурайи зегьмет ва ветеринарари вахтниинди гъабхурайи гюзчивал ву.
Ихь районарин гьякьнаан кIуруш, Хив райондин марччари Дербент зонайин галариъ кьюрдун вазар адаура. Дина райондинан ччилар апIру 10025 чарва хъаъну душна. 5-пи мартдиз вуйи улупбариинди, марччари 4045 ччил дапIна, чIивиди гъуздарин кьадар 3932 (97%) ву.
