Дагъустандин муфтиятдин мялуматарин дакьатари туврайи хабрариз асас вуди, Мягьячгъалайиъ кечмиш гъахьидарин майит жибкIру, марццишнанна эпидемиологияйин вари тIалабариз жаваб тувру йишв тешкил дапIна.
Думу йишв Дагъустандин аьтрафариин коронавирус тарабгъуз хъюгъювалихъди аьлакьалу вуди, апрелин 3-пи йигъан Мягьячгъалайиъ Каммаевдин ччвурнахъ хъайи кючейин 94-пи нумрайин хулариъ айи мистаъ ачмиш гъапIну.
Къайд апIувал лазим вуки, душваъ маллавалин аьгъювалар айи касари йишвнура-йигънура нубатчивал гъабхура. Мялуматарин гъуллугънаан хабар тувганси, сар инсандикан тмунурикна тарабгъру уьзриан гъакIи кас ислам диндиъ айи вари аьдатариинди накьвдик кивну ккунду. Хъа думу аьдатар, марццишнан къайдйир тамам апIури, кIули гъахувал лазим ву.
Учу гьаму месэлайин гьякьнаан Табасаран райондин имам Ансар Рамазановдихъди телефондиан сюгьбат гъапIунча. Дугъан гафариинди, му жюрейин пункт анжагъ МягьячгъалайиътIан ачмиш дапIнадар, гьаддиз гъулариъ яшамиш шулайидарира марццишнан тIалабар тамам апIувализ фикир тувуб лазим ву.
