Гюльнара Мягьямедова
Ушварин машквар (бицIи машквар) мусурмнарин варитIан ккуни машкврарикан саб ву. Думу ушвар дисру Рамазандин ваз ккудубкIиган улубкьуру. Магьа 2026-пи йисанра Рамазандин ваз аьхирихъна гъафну. Ураза машквран йигъ улубкьайиз, мусурмнари ушварин сеъ тувру. Думу ляхин машквар гьарсарин хулаз гъюз мумкинвал хьпан бадали апIурайиб ву. Ушварин машквран йигъан, Къурбан-байрамдин йигъанси, ушв бисуз гъадагъа дапIна.
Узу Табасаран райондин имамарин советдин председатель Ансар Рамазановдихьна, улубкьурайи машквар къайд апIбан саягънакан ктибтуб ккун апIури, илтIикIунза.
«Ав, магьа Рамазандин вазра аьхирихъна гъафну. Му ваз ккудубкIиган, гирами машквар улубкьура. Мирасар, багахьлуйир чиб-чпихьна гъягъюри, машквар тебрик апIури, гъидису ушвар кьабул апIри кIури, дурари Аллагьу Тяаьлайикан ккун апIуру. ДумутIан гъайри, му машквар ихь бицIидаризра аьхю шадвал ву. ГвачIнин ухди бицIидари, гьарсаб хулаз машквар тебрик апIуз гъягъюри, гъяфатар ва жара меълишнар уч апIуру.
Ушварин ваз ккудуб-кIбахъди аьлакьалу машквар рягьимлувалин, шадвалин машкварра ву. Гъит Аллагьу Тяаьлайи ихь гъидису ушвар, таравигь гъудгнар, туву ушварин сеэр ва имбу фарзар кьабул апIри. Гьарсарин рякъ ягъурлуб ибшри, гьарсаб хизандиз хъуркьувалар ва бахтар гъюри, гъюру йисан Рамазандин ваз улубкьайиз ухьуз варидариз сагъвал туври», – гъапнийи Ансар Рамазановди.
Ихь республикайиъ аьхюну пай агьалйири ислам дин хъапIра, гьаддиз машквран йигъар ляхин дарапIру йигъар вуди тяйин апIура, яна гьюкуматди ухьуз машквран йигъари ихь багахьлуйир машкврахъди тебрик апIуз мумкинвал тувра.
Гьелбетда, варитIан тамарзуди машквраз ккилигурайидар бицIидар ву. Дурар, вахт ккимиди чантйир-пакетар гьязур дапIну, гвачIнин ухди гъудужвну, десте-дестеди гъуншйирилан, гъуландарилан машквар мубарак апIури ва меълишнар уч апIури, илдицуру.
Рамазандин вазли рягьимлувал артухъ шулу. Мусурмнари гьаму гирами вазли исламдин хьуб фарзнакан саб вуйи рягьимлувалин ляхнариз артухъ фикир тувру. Девлетлу касари туканариъ касибвал кайидарин буржар ктичуру, бицIи ва аьхю гьяждиз путевкйир тувру, сатIиди ушв гьибтбан жямяаьтлугъ ифтарар гъахуру, бицIидариз пешкешар тувру.
Гьаму йисан Рамазандин вазли Дагъустандин рягьимлувалин ляхнар тешкил апIурайидар, блогерар ва аьдати инсанар «миодистрофия Дюшена» гъагъи уьзур кайи 9 йисаъ айи Сяид Мягьямадовдиз пул уч апIуз хъюгъну. Дугъан генетический уьзур сагъ апIуз анжагъ «элевидис» кIуру дармнихьантIан шуладар, хъа дармнин кьимат 230 миллион манат ву. Гьадму дармнин саб капельница гъапIиш, уьзур кьяляхъ гъябгъюру. Му кьадар пул уч апIуз аьдати хизандихьан гьичра удукьудар. Гьаму Рамазандин ваз ккебгъиган, республикайиъ Сяидриз дармниз пул уч апIурайибдикан мялум гъапIну.
Рягьимлувалин ужуб ляхнихъ блогерар хъюгъна. Дурари Сяидрикан социальный сетариъ ктибтури а. Волонтерари ва балин багахьлуйири, рякъярихъра кмиди дийигъну, пул уч апIура. Му ляхин фици кIули гъябгъюраш аьгъю апIури, узу Дербент шагьриан вуйи блогер, табасаран риш Заира Агъаметовайихьна (шиклиъ) илтIикIнийза.
«Узуз, блогер ву кIури, Мягьячгъалайиан зенг дапIну, Сяид Мягьямадовдиз кюмек апIуб ккун гъапIнийи. Гьелбетда, разивал тувунза ва узуз багахьди таниш вуйидаризра хабар дебккунза. Рягьимлувалин ляхнихьан сабанра ярхла шуладарча. Сяидриз лап багьа дарман лазим ву. Пул уч апIбан ляхин фици тешкил апIуруш, фикир гъапIнийча. Дербентдиъ Къазимбегдин ччвурнахъ хъайи кючейиъ ифтарин кьяляхъ гизаф жигьилари рягьятвал гъадабгъури шулу. Гьадму кючейиъ, меълишнарра гъадагъну, чай гьивувал тешкил гъапIнийча. Гьамци чай гьиври, шубуд йишван ляхин гъубхнийча. Сяидриз кюмек апIуз ккунидарин кьадар гизаф вуйи. Аьхюдариси, бицIидарира кмиди чпиз ккуни мутму гъадабгъуз уч апIурайи пулин дакьатар хьади гъюйи. Йиз бицIину риш Самияйи, пул ипру баллонра хьади, узутIан ужуди зегьмет гъизигнийи. Натижайиъ 2 миллиондиинакьан пул уч гъабхьнийи. Гьаму ляхин Сяид сагъ духьну, жара бицIидарси мектебдиз гъягъюри, гъюру машквран йигъан гъяфатар уч апIури, шадди сагъу уьмур хъапIбан бадали, варидари сатIиди кIулиз адабгъурахьа», – гъапнийи Заирайи.
Гъит гирами Рамазандин вазлин гьюрматнаан Сяид Мягьямадовдиз ва имбу аьзарлуйириз, мюгьтажвал кайидариз ва кьаза-балайиъ айидариз Аллагьу Тяаьла кюмек ишри.
Аьхиримжи вахтна сакьатвал кайи бицIидариз лап кIваантIан фикир туврайи «Дианайихъди уж’вал апIин» фонднан кIулиъ айи Диана Уьсмановайихъдира (шиклиъ) Рамазандин вазли гъуху рягьимлувалин ляхнарикан сюгьбат гъубхнийза. Дугъу гьамци кIура: «Гьаму Рамазандин вазлин садпи йигъариланмина ич фондну хайлин ужудар ляхнар кIулиз адагъну. Сифтена-сифте учу сакьат бицIидарин дадйириз ва хусуси метлеб айи дявдин операцияйиъ жилар гъийиху дишагьлийириз, яна 700 касдиз теклиф дапIну, ушв гьибтбан серенжем тешкил гъапIнийча. Душваъ 8 мобильный телефон, телевизор, гьарсариз тикилишчивалин кампанияйин терефнаан хулар гъадагъуз 100 агъзур манатдин кьимат айи сертификатар багъиш гъапIнийча.
Гьацира гьаму йисандин Рамазандин ваз Дагъустандиъ гъагъи уьзур кади аьзарлу духьнайи Сяид Мягьямедовдиз дармниз пул уч апIуз бахш дапIнайибси гъабхьну. Учура гьадму ляхнихьан ярхлади гъузундарча. Мягьячгъала шагьрин Гьямидовдин ва Имам Шамилин ччвурарихъ хъайи кючйир сатIи шлу йишв’ин бизнесменар, машгьур касар, блогерар жалб дапIну, Сяидриз кюмек тувуз гъафидариз ифтар гъубхунча. Гъагъи бицIидар айи «Забота» кIуру хулаз пешкешар, меълишнар хьади гъушунча. Гьамдиинди ляхин ккудубкIурадарча. Гьамус ихь шагьрин кючйир марцц апIру дишагьлийириз, хъархъвас уч апIру машинарихъ хъайидариз ифтар тешкил апIбанди вуча.
Вари гьаму ляхнар сари кIули гъахрудар дар, меценатар, спонсорар, волонтерар кюмекназ гъюри шулу. Ушварин вазли инсанар уж’вал апIуз, жвуван рюгь марцц апIуз гьялак шулу. Гьелбетда, удукьруси уж’вал гьарган дапIну ккунду. Хъа ихь каламариъ Аллагьу Тяаьлайи гьаму вазли гъапIу ужувлан ляхнар сабпи нубатнаъди кьабул апIуру, варж ражари артухъ апIуру, дупна. Пуз ккундузузки, Дагъустандин халкьар варитIан рягьимлудар, гъвалахъ хъайириз кюмек апIуз гьязур вуйидар ву.
Ифтарариз гъюрайидаризра пуз ккудузуз: сифтена-сифте, аьлгьямдулиллагь дупну, аьгъяди-аьгъдарди шлиз-вуш гиран ктапIнуш, сабур апIуз, хил алдабгъ пуз аьгъю апIинай. Хил алдабгъ пуз гъудубгъу касдин юкIв ачухъ ва гъюдли шулу. Читинвал кайириз кюмек апIуз дубгъай, сари пулиинди, тмунури чан иштираквалиинди ужувлан ляхнарик пай кивай», – гъапнийи Диана Уьсмановайи.
Дугъриданна, аьхиримжи йисари Дагъустандиъ Рама-зандин ваз халкьарин сабвалиинди тафавутлу шула. Ихь республикайин агьалйири жвуван багахь хьайидаризси, ярхла Палестинайиъ айи чвевалин халкьаризра кюмекар апIура. Гъит, ичв гъапIу ужудар ляхнар Аллагьди кьабул апIри. Ихь улубкьурайи машквар мубарак ибшри!
