«COVID-19» уьзур тарабгъурайивализ дилигну, Урусатдин Федерацияйин кIулиъ айидарин къарарниинди уьлкейиъ агъзрариинди карханйири апIурайи ляхин дебккна. Гьюкуматдин карханйириъ лихурайидарин маважиб дурар лихури адру вахтнара тувуз гаф тувра. Мицисдар уьлчмйири, гьюкуматдин экономикайизси, ватандашарин яшайишдин аьгьвалатназра гизаф зарар хура.
Карантин айи вахтна инсанар хулаъ дуснайиган, жара чара адар гизафси шагьрариъ яшамиш шулайи инсанари, вахт телевизорарин, компьютерарин улихь Интернетдиъ адапIура.
Хъа гьаму гъагъи аьгьвалатнаъ телевизорин передачйир, телефондин ва интернетдин аьлакьа ухьухьна рубкьувалин гъаразнаъ айидар фици лихураш аьгъю апIбан бадали, узу РТРС-дин филиал вуйи Дагъустан Республикайин РТПЦ-йин жямяаьтлугъдихъди аьлакьйир уьрхру пишекар Наида Гьяжиевайихъди гюрюшмиш гъахьунза. Дугъу чпин ляхникан гьамци ктибтнийи:
– Вари Урусатдин аьтрафариин али РТРС-дин филиаларин ляхинси, Дагъустан Республикайин РТПЦ-йин ляхнин къайдара Президентдин Указдиинди, зегьметнан ва экономикайин артмиш’валин министерствойин теклифниинди ва ич идарайин кIулиъ айирин амур апIбиинди, агьалйир аьлакьайихъди ва телевизорин сигналихъди тямин апIру карханйирси, йишвнура-йигънура ляхин апIру карханйирин гьисабназ гъадабгъна. Гьаддихъди аьлакьалу вуди, Дагъустан Республикайин РТПЦ-йин директор Гь.Сяидовди телецентриъ лихурайи, ляхниъ адарди хай даршлу касар гьар йигъан ляхниз гъюруси, гизафдар хулариан ляхин апIруси, хъа чарасуз лазим гъабхьиш, ляхниз удучIвруси, кьюб-шубуб йишваз пай дапIну, ляхнин къайда дебккну. Гьамусяаьт аварйир гъахьиган йишв-йигъ дарпиди кюмек тувру десте, гьаракатниинди идара апIбан отдел, хатIасузвал уьбхру гъуллугъ, филиалин дирекция ва циркларин цехарин кIулиъ айидар лихура.
Дагъустан Республикайин Роспотребнадзори ич филиализ пандемия мялум дапIнайи вахтна ляхин апIуз ихтияр тувна.
Филиалин аьтрафариин ва филиалин инженерар лихурайи чIатху объектарин аьтрафар гьар йигъан вирусар терг апIру дармнарихьди тартиб апIура. Филиалиъ марццишназ лигру пишекрари раккнарин хили бисру-швар ва гьяжатханйир гьар кьюб сяаьнак марцц апIура. Ляхниъ айи инженерариз маскйир ва элгжар тувна. Командировкайиз гъягъру инженерарин ва машин хъапIрударин бедендин температура ебцура, марццишнан ихтиятваликан гьархну даккниваликан кIваин апIура.
РФ-дин Президентдин Указдиъ улупнайи шартIар тямин апIбан бадали, Дагъустан Республикайин РТПЦ-йи чан объектариин 2020-пи йисан апрелин ва майин вазариъ пландиинди духну ккуни профилактикайин ляхнар жара вахтназ гъитну. Профилактикайин ляхнар гъахруган, варидари лигурайи телевидениейинна радиойин каналар хъяркьбакк ккубкьру, хъа гьамусяаьт телевидение-йин ляхин дебккуз мумкинвал адар. Гьаддиз ич идара шлубкьан ужуди чаин али вазифйир тамам апIбахъ хъа. Учу ляхин апIурача, учву хулаъ гъузбан бадали, – къайд гъапIнийи аьхириъ Наида Гьяжиевайи.
Гьаму читин аьгьвалатнаъ ухьу бадали ляхин апIурайидариз чухсагъул, чарасузвал адарш хулариан муудучIванай, гьюрматлу ватанагьлийир!
