2020-пи йисан 23-пи апрелиз вуйи улупбариинди, Дагъустандиъ коронавирусдиан 454 кас аьзарлу духьна. Аьхиримжи йишван ва йигъан аьзарлуйирин кьадар 37 касдиинди артухъ гъахьну. Сагъ гъахьидарин кьадар 43 кас, уьзриан гъийихдарин кьадар – 11 кас ву.
Къайд апIувал лазим вуки, CОVID-19 уьзриан гъийиху инсанар гьисабназ гъадагъган, Дагъустанди Урусатдин регионарин арайиъ 12-пи йишв дибисна. Духтрари йишвнура, йигънура зигурайи зегьметназ дилигди, реанимацияйиъ инсанар йихувал давам шула.
Аьзарлуйирин уьмуми кьадарнан улупбариинди, СКФО-йиъ ихь республика сабпи йишв’ин ал. Мициб аьгьвалат арайиз гъювал гьам республикайин агьалйири сабпи нубатнаъди хулаъ гъузувалин гьякьнаан вуйи тIалабар тамам апIури адрувалихъди, гьамсана медицинайин идарйир тIягъвнихьна бегьемди гьязур духьну адрувалихъди аьлакьалу ву. Гьаму гьяфтайиъ бязи махлукьатлу хабрарин дакьатари республикайин жюрбежюр больницйириъ аьзарлуйир сагъ апIурайи духтрарра иццру гъахьну, дурар лазим кьадарнаъди маскйирихъди, уьрхру палатдихъди, дармнарихъди тямин дапIнадар кIуру хабрарра чап гъапIнийи. Гьелбетда, мициб тIягъвнихьна, дюзди дупну ккун, саб уьлкейиъра, гьадму гьисабнаан Урусатдиъра ва ихь республикайиъра, бегьемди гьязур духьнадар.
Агьалйирин саб пай уьзрин хатIалувалихъ хъугърадар, тмундари, му аьгьвалат духтрари чпиз пул гъядапIуз дапIнайи ляхин ву кIури, гьисаб апIура, хъа бязидари духтрарин тIалабар гьясбикк апIурадар. Инсанари гизаф халкьар уч шлу йишварихьна гъягъювал давам, къайда уьбхювал ккун апIурайи къанун уьбхру органарин вакилар тянкьид апIура.
Районариз гъягъру рякъяр хъяркьну ашра, инсанар чпи яшамиш шулайи йишвариъ ктисурадар. Гъулариъ яшамиш шулайидари, магьа гъулаъ саб жюрейинра вирус адар, кIура. Хъана адарди ибшри, гъулаз вирус дяргъбан бадали, рякъяр хъяркьра. Мина-тина шагьрариз гъягъюри-гъюрайи инсанари ухди-кьанди вирус хибди.
Гизафдари гьерхра: наши аьзарлуйир, улупай учуз дурар. Думу касариз пуз ккундузуз: учву аьзарлу духьнайи вахтна видеокамерайиз адагъури гъахьиш, учвуз кьабул хьибдийчвуз? Ваъ, саризра кьабул шулдар.
Республикайин шагьрариъ агьалйириз чарасуз лазим вуйи идарйир – больницйир, поликлиникйир, почта, банк, МФЦ, ипIру-убхъру сурсатар масу тувру туканар, Роспотребнадзорин тIалабар тамам апIури, лихура.
Ихь сагъ’валин гъаразнаъ шулхьа, лазим дарди мина-тина гъягъюз гьялак махьанай!
