Вари дюн’яйиъси, Дагъустандиъра коронавирусди арайиз дубхнайи аьгьвалатну инсанар мюгьтал дапIна. Шлиз-вуш лап гучI дубхьна, хъа фуж-вуш му уьзрикан вуйи мялуматарихъ затра хъугърадар.
Дагъустандин муфтиятди, духтрари, гьюкмин ляхин кIулиз адабгъру органари гьар йигъан ихь респуб-ликайин агьалйирикан хулариан удудучIвувал, жвуван ва багахьлуйирин сагъламвализ артухъ фикир тувувал ккун апIура. Лап багарихьди динагьлийир артухъси мистариз гъягъру гирами Рамазандин вазра улубкьура.
«Гьаму йисан гирами Рамазандин вазлин садпи йигъ апрелин 25-диъ шлубси ву», – кIуру мялумат хьади рес-публикайин агьалйирихьна Дагъустан Республикайин муфтиятдин вакил Шамил Аьлиханов илтIикIну. Дугъан гафариинди, Ураза-байрам машкврин йигъ майдин 24-пи йигъан къайд апIруганси ву. Гъит, Первердигар Аллагьди диндин аьлимарин ва духтрарин теклифар кIулиз адагъуз ухьуз кюмек туври.
Гирами Рамазандин вазли республикайин муфтиятди мусурман чвйир-чйирикан чпин фарзар, гирами йигъари апIру вари гъудгнар, гьадму гьисабнаан тярявигь гъудгнарра, дюъйир гьарсар касди чан хулаъ апIувал, накьварихъна ва гизаф инсанар уч шлу йишварихьна дурушувал ккун апIура.
Агьалйириз рягьятди хьпан бадали, Инстаграмдиъ РД-йин Муфтиятдин асас аккаунтдиъ гьар йигъан гирами Кьур’ан ва жара дюъйир урхувал тешкил апIиди. Мидланра савайи, динагьлийириз онлайн къайдайиъди маракьлу вуйи суал хъипуз ва дидиз жаваб гъадабгъуз мумкинвал хьибди.
Республикайин муфтиятдин вакил Зейнуллагь Атаевди къайд гъапIганси, коронавирусдиан аьзарлу духьнайидари ва сар инсандикан жара инсандикна тарагъру уьзрар кайидари ушвар дидисну ккундар. Дугъан гафариинди, аьзарлу инсанди чан сагъламвализ зарар тувувал дюз дар.
Гьюрматлу мусурман чвйир ва чйир! Рамазандин ваз, Аллагьдин рякъюъ айи гьарсар инсан харжибдихъан хъадакну, уж’вал апIуз гьялак шлу, рюгь марцц апIру вахт ву. Ихь ккуни Мягьямад Пайгъамбри (с.аь.в.) гъапиганси, Рамазандин вазли женнетдин раккнар ачмиш апIуру. «Табасарандин нурар» газатдин редакцияйин коллективди, ихь вари ватанагьлийир улубкьурайи Рамазандин вазлихъди тебрик апIури, гьарсар касдиз мюгькам сагъ’вал, уж’вал, хизандиъ хушбахтвал, хулаъ берекет хьувал ккун апIура. Гъит, гьаму аку вазли ихь гьарсарин рюгь марцц ва сикин апIри, рягьимлувалин, хъайивал апIбан ва сабурлувалин марцци гьиссар ачмиш апIри.
