Гюльнара Мягьямедова
27-пи мартди Урусатдиъ Милли гвардияйин кьушмарин йигъ къайд апIуру. Думу йигъ 2016-пи йисан 5-пи апрели Урусатдин Президент Владимир Путиндин указниинди тяйин гъапIуб ву. Дидиз улихьна, 1996-пи йисхъанмина му йигъ РФ-дин айтIан ляхнарин министерствойин айтIан кьушмарин йигъ вуди къайд апIури гъабхьиб ву.
2026-пи йисан Федеральный гъуллугънан милли гвардияйин кьушмари кьюб машквар къайд апIура: идара арайиз дуфну 10 йис тамам хьубан ва 1811-пи йисан 27-пи мартди Александр I (Сарпирин) указниинди уьлкейин айитI къанундин къайда уьбхру гьаму жюрейин кьушмар арайиз дуфну, 215 йис тамам хьубан.
Гъи Росгвардияйин йицIуд агъзрариинди гъуллугъчйир гьюкуматдин наградйириинди лишанлу дапIна: идарайин дахилнаъ 306 кас Советарин Союздин игитар, 194 кас Урусатдин Федерацияйин игитар а. 2024-пи йисан Урусатдин Президент Владимир Путиндин указдиинди Урусатдин Федерацияйин Милли гвардияйин федеральный гъуллугънан кьушмарин директор – Урусатдин Федерацияйин Милли гвардияйин кьушмарин кIулин командующий, армияйин генерал Виктор Золотовдизра Урусатдин Игит ччвур тувну.
2022-пи йисхъанмина РФ-дин Милли гвардияйин кьушмар Урусатдин яракьлу кьувватарихъди сабси хусуси метлеб айи дявдин операцияйиъ чпин улихь дивнайи гъуллугънанна дявдин месэлйир гьял апIури иштирак шула. Росгвардияйин гъуллугъчйири Украинайин яракьлу кьувватарихьан азад гъапIу шагьрар-гъулариъ агьалйир тахсиркарваларихьан уьрхюра, жямяаьтлугъ хатIасузвал тямин апIура. Дурари ерли агьалйириз ислягьвалин уьмур къайдайиз хуз, ипIру-убхъру сурсатарихъди, дармнарихъди тямин апIуз кюмек тувра, инфраструктурайин важиблу объектар, транспортдин, атомдин энергетикайин коммуникацйир уьрхюра.
Росгвардейцйири Курский областдиъ чпин дирбаш’вал улупну. Гъуллугънан офицерари ва эскрари душмандин танкар, бронетранспортерар, беспилотникар ва жара техника дагъитмиш апIури, душмандин чIиви кьувват терг апIури гъахьну. Идарайин спецназдин ва разведчикарин ахтармишариин гьисабназ гъадагъури, душмандиз ракетйирин, авиацияйин ва артиллерияйин цIа уьлюбхюри гъахьну.
Росгвардияйин инженераринна технический подразделенйирин гъуллугъчйири кьушмар гъягъру рякъяр ахтармиш апIуру, рякъяриккан тIуркIру сяняатар ккадагъуру ва дурар хатIасуз апIуру.
Украинайиъ хусуси метлеб айи дявдин операция ккебгъу йигъланмина Росгвардияйин 20 гъуллугъчийиз Урусатдин Игит ччвур тувна.
Росгвардияйиз авиацияйин ва гьюлерин кьушмарин подразделенйир а, дурар 3 агъзуртIан артухъ хуйир айи кинологарин гъуллугънахъди тямин дапIна. Росгвардияйин Балашихайиъ айи инженервалинна техникайин тяминвалин центриъ саперариз алабхьру цIийи палат, минйир ккадагъру робототехникайин комплексар арайиз адагъру центри ляхин апIура.
Росгвардияйин гъуллугъчйири, Урусатдиъси, жара йишвариъра гъуллугъ гъабхура: Казахстандиъ Байконур космодром Росгвардияйин гъуллугъчйири уьбхюра, хъа 2020-пи йисхъанмина Арктикайиъ айи Урусатдин 9 портра Росгвардияйихьна уьрхюз тувна.
Юбилейин йисан вари уьлкейиъ ватанпервервалин серенжемар планламиш дапIна. Гьаци, Росгвардияйи кьушмарин игитвалин рякъкан ктибтурайи тарихдинна ватанпервервалин «Росгвардия. Тарихдин кIварар» проект уьмриз кечирмиш апIура. Милли гвардияйин 10 йисандин юбилейиз бахш вуди Федерацияйин Советдиъ выставка ачмиш дапIна.
Урусатдин милли гвардияйин Федеральный гъуллугънан Дагъустан Республикайиъ айи идарайи гьар йисан 27-пи мартди гъуллугъ арайиз гъюбахъди аьлакьалу серенжемар гъахура. Урусатди гъабхурайи хусуси метлеб айи дявдин операцияйиъ лишанлу гъахьи пишекрариз гьюкуматдин ва идарайин наградйир, гьюрматнан грамотйир тувра.
Росгвардияйин гъуллугъчйир чпин юбилейихъди тебрик апIури, дурариз жандин мюгькам сагъвал ва дюн’яйиъ ислягьвал ккун апIурача.
