Наргиз Гюлечова
Дагъустандин нежбрар гъулан мяишатдин ляхнариин эллешмиш духьна. Республикайин гъулан мяишатдин ва ипIру-убхъру сурсатарин министерствойин пресс-гъуллугънаан тувнайи мялуматариинди, гьаму йисан Дагъустандиъ 369 агъзур гектар хутIлариъ тумар урзуб планламиш дапIна. Му ккудубшу йисантIан 13 агъзур гектарин артухъ ву.
Министерствойи тувнайи мялуматариинди, пландиинди улупнайи кьадар хутIларикан хьадукран вазари 225 агъзур гектариъ тумар урзбанди ву. Му сачтIан 3 агъзур гектарин артухъди ву. Хъа гъубзрайи 144 агъзур гектариъ чвлин вазариантIан мягьсулар дурзну гьязурди а.
ХутIлариъ урзурайи тумар жа-жаради гьисаб гъапIиш, варитIан гизафси малдарвалин цирклиз лазим шлу культурйир урзура. Гьаци, улупнайи кьадар хутIларикан 96 агъзур гектариъ алафар апIру культурйир, 60 агъзур гектариъ тахил (гьаддикан 13 агъзур гектариъ – дюгю), 40 агъзур гектариъ мейвйир, 18 агъзур гектариъ картфар, 7,2 агъзур гектарин хутIлариъ бахчайин культурйир урзиди.
Хьадукран вазари варитIан гизафси тумар республикайин 6 райондиъ урзиди – Къизлар, Хасавюрт, Тарумов, Нугъай, Бабаюрт ва Леваши районариъ. Гьаму йирхьби районари улупнайи кьадар хутIларин саки гьацI пайкьан чпиина гъадабгъна.
Мидланра гъайри, хьадукран хутIларин ляхнар кIули гъахбан бадали, 11320 тоннакьан техникайихъ хъубзру убгру ва ктатру материалра (ГСМ) лазим шула.
Министерствойиан тувнайи мялуматариинди, гъийин йигъаз 500 тонна солярка гьязур дапIна, ва лазим вуйи кьадар масу гъадабгъуз читинвалар зат адар. Асас вуди Дагъустанди ГСМ Чечен республикайин, Краснодар ва Ставрополь краярин нефтебазйириан масу гъадабгъура.
