Гюльнара Мягьямедова
Гьар йисан Урусатдиан 25 агъзуртIан артухъ мусурмнар гьяждиз гъягъюру. Магьа ццира 10 агъзурна 700 касди гьяждиз гъягъюз ният дапIна. Дурарикан аьхюну пай гирами ругариина сабпи ражари гъягъюра.
28-пи апрели «Дагъустан» РИА-йиъ 2026-пи йисан гьяждиз гъягъбан гьязурлугвалариз бахш дапIнайи пресс-конференция кIули гъубшнийи. Журналистарихъди вуйи сюгьбатнаъ РД-йин милли политикайин ва диндин ляхнариз лигру министерствойин диндин ляхнарин управлениейин начальникдин вазифйир тамам апIурайи Шамил Нажмудиновди, РД-йин сагъламвалин министерствойин штатдиъ адру аьхюну эпидемиолог Мурад Гьяжиевди, УФССП-йин Дагъустандиъ кIулиз адабгъбан производствойин отделин начальник Минатулла Аьлиевди, «Мягьячгъала» аэропортнан таможняйин постнан начальник, томоженный гъуллугънан полковник Рустам Батыровди, «Марва-тур» офисдин кIулиъ айи Мягьямад Мягьямадовди гьяждиз гъягърударин гьязурлугваларикан, дурарихьна вуйи тIалабарикан ктибтнийи.
«Гьаму йисан гьяждиз гъягъбан къайдйир думукьан дигиш духьнадар. Логистикана хатIасузвал бегьем тартиб дапIна. Саб цIийивал а: ккудубшу ва улихьна йисари гьяждиз бязидар туриствалин визайиинди гъягъюйиш, гьаму йисан хусуси метлеб айи гьяждин визйир хьтарди сарихьанра дина гъягъюз хьибдар, фицики Саудовский Аьравияйин гьюкмари гьяждин вахтна туриствалин визйириинди гъюрудариз Меккайиз рякъ хъябкьна.
Туриствалин визйириинди гьяждиз гъягъюз теклиф апIрударихъ хътругъуб ккун апIурача. Паччагьлугъдин гьюкмарихьан дици гъафи кас чпин уьлкейиан утIуккуз шулу», – гъапнийи Миннацдин вакил Мурад Ражабовди.
Минатулла Аьлиевди жара уьлкейиз гъягъюб гъадагъа дапIнайи дагъустанлуйирикан гъулхнийи. Суддин приставарин гъуллугъну туроператорарихъди ляхин дубхну, гьисабназ гъадагънийи: дицисдар агьалйирин кьадар 100 агъзуриинакьан удубчIвна. Гьадму сиягьнаъ ади гьяждиз гъягъюз документар гьязур дапIнайидар гъаврикк ккаъна. Сиягьнаъ 10 агъзур манаттIан артухъ буржар кайидар, журум (штраф) дапIнайидар, ясана чпин улихь хусусиятнан гьякьнаан дару жара тIалабар дивнайидар а. «Учв гьяждиз гъягъру йигъан аэропортдиъ бурж, штраф тувуз гъабхьишра, думу йигъан дугъаз гьяждиз гъягъюз ихтияр тувдар, фицики, бурж ктипуб тасдикь апIбан бадали 24 сяаьт лазим шулу. Учвухъ бурж хъашна-хъадарш Госуслугйириъ учIвну, аьгъю апIуз шулу», – гъапнийи Минатулла Аьлиевди.
«Марва-тур» офисдин кIулиъ айи Мягьямад Мягьямадовди къайд гъапIганси, гьяждиз гъягърударин дестйирин кIулиъ айидари буржар кайидар гъаврикк ккаъна. Мидланра савайи, гьадму гъадагъайикк ккахъуз мумкин вуйи 5 агъзур паломникдихъди ляхин дубхна. «Марва-тур» гьяждиз гъягърудар гирами ругариина хъуркьиган, яшамиш шлу йишвахъди, ипIрубдихъди, аьдатарихъди ва гьарсаб жарабдихъди тямин апIуз 100% гьязур ву. Гьяждиз гъягъюз гьязур шулайидарихьан Мягьячгъалайин шагьрин 3-пи больницайиъ чпин сагъламвал пулсузди ахтармиш апIуз шулу», – гъапнийи дугъу.
Мягьячгъалайин аэропортдиъ таможняйин къайдйирикан Рустам Батыровди ктибтнийи «Мягьячгъалайин аэропортдиан самолетарин 64 рейс планламиш дапIна, 10 700 визара тувна. Гьяждиз гъягъюрайи гьарсар касдиз хусуси шей’ар 50 килойиинакьан гъахуз-хуз ихтияр а. Эгер гьадму кьадартIан артухъ гъагъ хуз ккун гъабхьиш, ясана хурайи мутмуйин кьадар хусуси ишлетмиш’вализтIан артухъ вуйивал гъябкъиш, гьадмуган читинвалар арайиз гъюз мумкин ву. Жвувахьди гъабхру пулин гьякьнаан улхуруш, дидин кьадар 10 агъзур евротIан артухъ дубхьну ккундар», — къайд гъапIнийи таможняйин гъуллугънан полковникди.
Чан улхбаъ Мурад Гьяжиевди гьяждиз гъушдарик сарикан тмунурикна тарагъру жюрбежюр уьзрар кучIвуз мумкин вуйиваликан гъапнийи. Дугъан гафариинди, гьяждин вахтна Саудовский Аьравияйиъ туберкулез, цIийир-мяхъяр, фунин инфекцияйин уьзрар тарагъну шулу, фицики гирами ругариина вари дюн’яйиан 2 миллиондиина гьяжйир гъюру. Думу уьзрарихьан жвуван беден уьбхбан бадали, дина гъягъяйиз рубар йивну ккунду. Саудовский Аьравияйин вакилари чарасуз йивну ккуни рубарин сертификат тIалаб апIуру. Мидланра савайи, гизаф инсанар уч духьнайи йишварихь марццишнан къайдйир уьрхюб чарасуз ву: кми-кмиди хилар жикIуб, медицинайин маска алабхьуб, хуйир-гатйирик ктручуб. Гьамцдар ва жара теклифар кайи кагъаз гьарсар паломникдихьна тувру.
Журналистари «Марва-турин» офисдин кIулиъ айи Мягьямад Мягьямадовдихьан, гьаму йисан гьяждиз путевкайин кьимат фукьан вуш, гьерхнийи. Дугъан гафариинди, путевкайин кьимат 450 агъзур манат удубчIвура. Долларин кьимат гьаму йисан ис хьувализ дилигну, гъубшу йисантIан гьаму йисан гьяждиз гъягъбан кьимат 50 агъзур манатдин цIиб дубхьна.
Къайд апIуз ккундузузки, гьяждиз душну кьяляхъ гъафидарин улупбариинди, думу кьадар пул гьубкIри шулдар. Эгер учву гьяждиз гъягъюб планламиш апIураш, цIиб артухъдиси пул уч дапIну ккунду.
Пресс-конференцияйин иштиракчйири Урусатдин Федерацияйиъ диндин экстремиствалин вуди гьисаб дапIнайи литература хуз ихтияр адруваликанра гъапнийи. Вари китабар, РФ-дин юстицияйин министерствойин сайтдиъ экстремист литература вуди гьисаб дапIнайи сиягьнаъ айидар вуш-дарш, ахтармиш дапIну ккунду. Къанунсуз китаб хьади Урусатдиз гъюрудар гъахьиш, дурар административ, хъа бязиган уголовный жавабдарвалихъна хуз мумкин ву.
Гьяждиз гъягъюрайи гьюрматлу юлдшар, къанундин къайда уьбхяй, ислам диндин ичв гардандиъ айи фарз тамам апIуз Аллагьди кюмек тувричвуз!
