Гюльнара Мягьямедова
Табасаран райондиъси, Хив райондиъра Багъир Шихяфизов аьгъдру касар цIибтIан адаршул. Агьалйириз дугъан ччвур таниш вуйивал гьаму кьюб райондиъ телевизионный, радио, мобильный аьлакьа дебккбахъди аьлакьалу ву.
Багъир Шихяфизов Табасаран райондин Жвулли гъулаъ бабкан гъахьну. Думу бицIидихъанмина радиотехникайиин юкIв алир вуйи. 1985-пи йисан мектеб ккудубкIбан кьяляхъ Ставрополин аьлакьайин электротехникумдик урхуз кучIвну. Техникум ккудубкIну, Шихяфизов советарин армияйин жергйириъ чан ватандаш’валин буржи тамам апIури гъахьну. Чав гъадабгънайи пишейиз дилигну, дугъу армияйиъ чав гъуллугъ апIурайи частнаъ аьлакьайин оборудованиейин ляхин тямин апIури, техникумдиъ гъадагъу аьгъювалар ляхниъ ишлетмиш апIури гъахьну.
Багъир Шихяфизовди чан зегьметнан рякъ Дербент шагьрин телефонарин аьлакьа тямин апIру Дербентдин ЭТУС-диъ (эксплутационно-технический узел связи) ккебгъну. Дугъу ЭТУС-диъ шубуд йисан электромеханикди ляхин апIури гъахьну. 1992-пи йисан РТРС-дин (Урусатдин телевидениейин ва радиовещаниейин циркил) Дагъустан Республикайиъ айи РТПЦ-йин (Республикайин радиойинна телевидениейин сигнал тувру центр) филиалин Табасаран райондиъ айи «Хучни» РТРС-диъ аьхюну электромеханикди ляхин апIуз хъюгъну. Гьаддихъанмина гъийин йигъаз Багъир Шихяфизов радиойинна телевидениейин, мобильный аьлакьайин цирклиъ лихура.
«Ляхникан фу пузахъа, –ккебгъра ич сюгьбат Багъир Гьяжимягьямадовичди. – Узу Ягъдигъарин гъулан кIакнаъ айи телевизионный мачтайиина ляхниз кьюрд-хьад, йиф-мархь дарпиди гъягъюри гъахьунза. Дина машиндин рякъ гъира адар пуз шулзухьан, фицики айи рякъюъди «Нива» машиндихьантIан гъябгъюз шулдар, хъа узу ляхниъ учIву садпи йисари лапра гъагъиди вуйи. Думуган машинра адайзуз, саб гьяфтайиз ипIрубра хьади, ляхниз яягъди гъягъювал алабхъуйи. Вышкайин гъвалахъ хъайи саб бицIи хулаъ нубатнахъди дежурствйир гъахури шуйча. Яшайишдиз ужудар шартIарра адайи, вушра жвувахъ хъайи ляхин намуслувалиинди тамам апIуз чалишмиш шуйча. Гьамус цифровой телевидение либхуз хъюгъхъанмина, вышкйириин дежурствйир апIури имдар. Техникайин хъуркьувалар ляхниъ ишлетмиш апIури, инсанарин яшайишдин ва ляхнин шартIар за духьна. Ихь уьмриз цифровой телевидение гъафихъанмина Табасран райондин Мягьрягъ, Хюрикк, Хив райондин ВертIил гъулариъ айи вышкйирин ляхнаризра лигураза. Асас гъуллугъналан савайи, вахт ккабхъиган, интернет-провайдер «Флай-теч» ООО-йихъди сабси Табасаран ва Хив районарин гъулариъ мектебариз интернет зигбаъра иштирак гъахьунза», – гъапнийи йиз сюгьбатчийи.
Багъир Шихяфизовди ихь ватанагьлийириз телевидение, радио, телефондин, мобильный аьлакьа тямин апIбан ляхниз чан уьмрин 35 йистIан артухъ бахш гъапIну. Думу гьамусра ляхнарихьан ярхла духьнадар ва РТРС-дин Дагъустандиъ айи филиалин Дербент райондин Жалгъан гъулаъ айи базовый станцияйиъ лихура. Дугъан гъарашугъарин гафариинди, Багъир Шихяфизов гьарсаб ляхнин устад ву.
Багъир Шихяфизов ва дугъан гъарашугъар чпин пишекарвалин машкврахъди тебрик апIури, дурариз жандин сагъвал, ляхниъ хъуркьувалар ккун апIурача.
