Майдин 4-пи йигъан Дагъустан Республикайин главайин вазифйир вахтназди тамам апIрурди мидиз улихьна республикайин Верховный суддин председателди лихури гъахьи Федор Щукин тяйин гъапIну. 2020-пи йисан октябрин вазлиланмина Дагъустандин кIулиъ ади гъахьи Сергей Меликов, жара ляхниз удучIвбахъди аьлакьалу вуди, вахтназ улихьна гъуллугънаан удучIвну.

30-пи апрели Урусатдин Федерацияйин президент Владимир Путинди, Дагъустандин вакиларихъди гюрюшмиш духьну, Сергей Меликовди гъапIу ляхниз чухсагъул гъапнийи: «Сергей Аьлимовичдин гъуллугънан вахт сентябри ккудубкIурайи. Дугъу региондин кIулиъ ади, хайлин жафа гъизигну. Ухьу дугъкан рази вухьа. Амма думу жара ляхниз удучIвура, уьмур давам шула». Гьюкуматдин кIулиъ айири Федор Щукиндин кандидатурайиз чан разивал тувну.
Вахтназди республикайин главайин вазифйир тамам апIурайи Федор Вячеславович Щукин 1976-пи йисан 4-пи августди Горьковский областдин Починки кIуру гъулаъ бабкан гъахьну. Дугъу 1997-пи йисан Лобачевскийин ччвурнахъ хъайи Нижегородский гьюкуматдин университетдин юридический факультет ккудубкIну. Чан зегьметнан рякъ промышленностдин карханйириъ ккебгъну, райондин Земский собраниейин депутатди гъилихну.
2004-пи йисан апрелин вазлихъанмина Починковский райондин суддин 1-пи нумрайин участокдин мировой судьяди лихуз хъюгъну, хъа 2005-пи йисан ноябрин вазли Федор Щукин гьадму райондин судьяди дерккну. 2013-пи йисан чвну Федор Щукин Семеновский райондин суддин кIулиъ дийигънийи. 2019-пи йисан чан гъуллугънан ихтиярарин вахт ккудубкIиган, садсан йисан думу гъуллугънаъ гъузну, хъасин Нижегородский областдин суддин председателин заместителди лихуз хъюгъну.
2024-пи йисан февралин вазлихъанмина Федор Щукин Дагъустандин Верховный суддин председателди лихури айи.