Гюльнара Мягьямедова
13-пи майди Дагъустан Республикайин Халкьдин Собраниейин 56-пи сессия кIули гъубшну. Дагъустан Республикайин Правительствойин председателин гъуллугъниина Мягьямад Рамазановдин кандидатура улупубра кади, сессияйиина гьял апIбан бадали 29 месэла адагънайи.
КIваина хурача, 6-пи майди Дагъустандин кIулиъ айири Мягьямад Рамазанов вахтназди премьер-министрди дерккнийи.
РД-йин Халкьдин Соб-раниейин депутатари РД-йин Правительствойин председателин гъуллугъниина улупнайи Мягьямад Рамазановдин кандидатурайиз варидари разивал улупнийи. Улихьнаси дугъу Дальний Востокдиъ ляхин апIури гъахьну.
Сессияйиъ Мягьямад Рамазанов удучIвну гъулхну. «Республикайин гьюкмин мянфяаьтлу ляхник умуд киврайи агьалйирин улихь уз’ин али жавабдарвалин гъаври аза. Гюкмин ляхнин тажруба ва Дагъустандин мумкинвалар бина вуди гъадагъидихьа.
Правительствойи мянфяаьтлуди, албагну, ачухъди, республикайин агьалйирин гьар йигъандин месэлйириз фикир туври ляхин апIуз вари кьувват сарф апIидиза.
Гъийин йигъаз ихь улихь дийигънайи месэлйирикан асасуб гъургъу аьхю мархьари арайиз гъахи читинвалариан кIул адабгъуб ву. Федеральный ва региондин гъуллугъари йишвнура-йигънура ляхин гъабхура. Зарар гъабхьи гьарсар касдиз чахьна гьачIабккнайи кюмекнан хил дябкъну ккунду.
Республикайиъ 160 рякъ чIур гъахьнийи. Гъийин йигъаз рас дарапIди 17 рякътIан имдар. Дурарра багарихьди рас апIиди. Рас апIбан бадали гизаф вахт лазим вуйи гъядар пландиз асас вуди гъадагъна. Гъюру йисан эвелариз гьадму ляхнар дапIну ккудукIбак умуд киврухьа.
Дагъустандин Прави-тельствойин ляхни агьалйирин яшайишдин месэлйириз, хусуси метлеб айи дявдин операцияйин иштиракчйирин хизанариз, бедендин сагъвал адрудариз, уьмрин читин аьгьвалатнаъ ахьнайидариз асас фикир тувдихьа.
Дагъустандин гъийин яшайишдинна экономикайин артмиш’валин месэлйирин ужуди гъавриъ ахьа. Гьаддиз, агьалйирин кIвак къурху кипрайи суалар сабпи нубатнаъди гьял дапIну ккунду.
Ихь улихь дийибгънайи месэла артмиш’валин гьяракат айиси уьбхюбси, ужудар натижйирихъна гъюбра ву. Аьдати инсанди урхбан заведение ккудубкIган, дугъаз ляхниъ учIвуз мумкинвал ади ккунду.
Узу ляхин тIалаб апIрур, амма рабочий аьлакьйириз гьарган ачухъур вуза. Ляхниъ гъуллугъчийин пишекарвал, жавабдарвал ва марццивал ади ккунду», – гъапнийи чан улхбаъ Мягьямад Рамазановди.
ЦIийи премьер-мини-стр тяйин апIбан гьякьнаан чан фикир ачухъ апIури, РД-йин транспортдин ва рякъярин мяишатдин министрин вазифйир гъахурайи Арсланбег Аьлибеговди гьамци гъапну:
«Ихь республикайиз важиблу гьядиса гъабхьну. Халкьдин Собраниейин депутатари Мягьямад Исрафилович Рамазанов Дагъустандин Правительствойин председателин гъуллугъниин тяйин гъапIну.
Чан улхбаъ дугъу региондин правительствойин улихь дийигънайи асас месэлйирикан гъапнийи. Жаради рякъяринна транспортдин инфраструктурайин рас апIбан месэлйириин дийигънийи. Мягьямад Рамазановди къайд гъапIганси, гъургъу аьхю мархьари чIур дапIнайи рякъяр, хулар-йишвар вари къайдайиз хайизкьан, месэлйир гьар йигъан гюзчиваликк гъузди. Зарар гъабхьи инсанариз вахтниинди кюмек тувбаканра гъапну.
Рякъяр, гъядар, гъуларихъди транспортдин аьлакьа уьбхюб ич министерствойин улихь дийигънайи асас месэлйир ву. Правительствойин Председатели гьадму месэлйир чан гюзчиваликкна гъадагъураш, умуд кивуз шулу: саб рякъра, гъядра рас дарапIди гъубзидар».
