Наргиз Гюлечова
17-пи майди Каспийск шагьриъ айи «Анжи Арена» стадиондиин Урусатдин премьер-лигайин (РПЛ) аьхиримжи, 30-пи турин талит кIули гъубшну. Талитназ Мягьячгъалайин «Динамо» ва Москвайин «Спартак» футболин командйир удучIвнийи.

Стадиондиина кьюбрид командйир уч духьну, талит ккебгъуз гьязур духьнайи вахтна, тупраз сабпи лик гъивур 102 йис яшар духьнайи Ватандин Аьхю дявдин ветеран, Каспийск шагьрин агьали Муса Багьаутдинов вуйи. Думу майдандиина «Динамо» Мягьячгъалайин учредителарин советдин председатель Мягьямад Багьаутдиновди хъади гъафнийи.
Командайихьна вуйи гьюрмат улупури, аьхиримжи талитназ стадиондиина Дагъустанди главади лихури гъахьи ва командайиз аьхю кюмек туврайи Сергей Меликов, вахтназди республикайин главайин вазифйир тамам апIурайи Федор Щукин ва республикайин Правительствойин председатель Мягьямад Рамазановра дуфнайи.

РПЛ-йин 2025-2026-пи фаслиъ анжагъ 26 очкотIан гъазанмиш дапIну адрувалиан 14-пи йишв’ин али Мягьячгъалайин «Динамойиз» я учв гъалиб дубхьну, ясана матчдин гьисаб 0:0 дубхьну ккунди айи. Гьаци гъабхьнура ву: матч 0:0 гьисабниинди аьхирихъна гъафну ва «Спартак»-ди очкйириинди, «Локомотив» командатIан кьяляхъ дубхьну, 4-пи йишв гъибисну. Урусатдин Премьер-лигайиъ 1-пи йишв «Зенит», хъа кьюбпи йишв «Краснодар» командйири гъазанмиш гъапIну.
Урусатдин Премьер-лигайиъ гъузбан бадали, Мягьячгъалайин «Динамо» командайи 20-пи майди Ека-теринбургдиъ, хъа 23-пи майди Каспийскдин «Анжи Арена» стадиондиин Екатеринбург шагьрин «Урал» командайихъди уйнамишар кIули гъахиди. Думу команда Сабпи лигайи 3-пи йишв гъадабгъу команда ву. Гьаддиз гьаму талитар гъахбиинди, Мягьячгъала «Динамо» РПЛ-йиъ гъубзруш, даршсана Урал» душваъ шулуш ашкар хиьди. Футболин цIийи фаслиъ РПЛ-лиъ фуну команда шулуш, гьаму талитарин натижйирилан асиллу хьибди.